Од Министерството за здравство апелираат сите што имале контакт со починатиот поранешен пратеник да соработуваат со епидемиолозите, а погребот да се спроведе согласно протоколите за спречување на ширењето на ковид-19
Министерството за здравство информира дека откако кај починатиот Амди Бајрам постмортем е утврдено дека истиот бил позитивен на ковид-19, Центарот за јавно здравје-Скопје ги презема сите мерки за заштита и спречување на понатамошно ширење на инфекцијата во и вон неговото семејство и сите оние кои во изминатиот период имале интензивни и блиски контакти со починатиот.
„Од страна на ЦЈЗ Скопје, согласно редовната постапка во вакви случаи, итно ќе биде спроведена епидемиолошка анкета со најблиското семејство на починатиот со цел точна и детална идентификација на контактите во изминатите денови. Со анкетата, ќе биде направена евалуација на степенот на ризик и ќе биде дадена препорака за тестирање, односно самоизолација за неговите контакти. Согласно анкетата, Државниот санитарен и здравствен инспекторат веднаш ќе издаде решенија за изолација за лицата за кои таа ќе биде одредена“,
се вели во соопштението на Министерството за здравство.
Министертството за здравство изразува сочувство до семејството и апелира, во интерес на заштита на нивното здравје, во целост да соработуваат со надлежните служби.
Од таму порачаа да се избегнат сите погребни ритуали, а погребот да се спроведе согласно протоколите, како превенција од понатамошно ширење на ковид-19.
Бајрам беше тестиран посмртно, откако денеска во болницата „Жан Митрев“ бил донесен починат. Пред две недели, во Истанбул тој правеше свадба за внука си со повеќе од 200 гости од Македонија.