Според локалните медиуми, ситуацијата во овие градови сѐ повеќе потсетува на почетокот на пандемијата, пред една година, а болничките кревети брзо се полнат со заразени
Во Италија за еден ден се регистрирани 347 смртни случаи од ковид-19 и речиси 21 000 новозаразени, а процентот на заразени во однос на бројот на тестирани се зголемува и изнесува 5,8 проценти, јавија локалните медиуми.
Гвидо Бертоласо, советник на претседателот на регионот Ломбардија, тврди дека Италија со големи чекори се приближува кон нов карантин.
Централната власт засега ја отфрла таквата можност и наместо да ја затвори целата национална територија, применува локални мерки.
Претседателите на одредени региони сами ги заоструваат антиковид-мерките.
Болоња и Модена, кои се наоѓаат во регионот Емилија-Ромања, ќе бидат ставени во карантин во следните неколку часа.
Според локалните медиуми, ситуацијата во овие градови сѐ повеќе потсетува на почетокот на пандемијата, пред една година, а болничките кревети брзо се полнат со заразени.
Директорот на болницата „Санта Орсола“ во Болоња, Андреа Занони, тврди дека сегашните пациенти на одделите за интензивна нега се помлади, луѓе на возраст меѓу 40 и 60 години, за разлика од првиот бран на заразата кога лицата над 80 години биле најмногу загрозени.
Весникот „Фато котидиано“ ги пренесува резултатите од студијата на Универзитетот во Лондон, според која британската мутација на вирусот се шири за 40 до дури 90 проценти побрзо од оригиналниот вирус.
Шефицата на одделот за интензивна нега во болоњската болница Даниела ди Лука тврди дека текот на болеста кај оние што се заразени со британската мутација е побрз и оти состојбата се влошува за неколку дена.
„Нашите сили се при крај. Бараме колективот да ни помогне“,
истакна Ди Лука и апелира до граѓаните да бидат поодговорни, да се придржуваат кон мерките.