По егзекуцијата на маж кој учествуваше во протестите, познатата актерка на социјалните мрежи напиша дека секоја меѓународна организација што го гледа ова крвопролевање и не презема ништо е срам за човештвото. Режимот во Иран ја уапсил затоа што актерката немала докази за ваквите нејзини обвинувања кон власта
Иранските власти ја уапсија една од најпознатите актерки во земјата откако таа изрази поддршка за антивладините протести и имаше објава за егзекуцијата на еден демонстрант.
Државните медиуми објавија дека актерката Теранех Алидости (38) е приведена под обвинение за „ширење невистини“ за протестите што избувнаа во Иран.
Таа минатата недела на Инстаграм ја осуди егзекуцијата на маж поради вмешаност во демонстрациите. Мажот беше обесен откако властите го обвинија дека е „бунтовник“ кој го блокирал главниот пат во Техеран и дека бил припадник на паравоени сили.
„Неговото име беше Мохсен Шекари. Секоја меѓународна организација која го гледа ова крвопролевање и не презема ништо е срам за човештвото“,
напиша Алидости на социјалните мрежи.
Во објаснувањето за нејзиното апсење, државната новинска агенција ИРНА, објави дека актерката не обезбедила никаков документ за ваквите нејзини тврдења.
И нејзиниот профил на Инстаграм, каде таа имаше повеќе од осум милиони следбеници, беше блокиран.
Алидости на меѓународната сцена е најпозната по филмот „Продавачот“ кој во 2016 година освои Оскар за најдобар меѓународен филм.
Таа стана гласен критичар на иранските власти кога тие се обидеа да ги запрат демонстрациите ширум земјата кои избувнаа поради смртта на 22-годишната девојка Маша Амини што почина во притвор на иранската полиција поради морал, а беше приведена затоа што не носеше правилно хиџаб.
Актерката и претходно ја искажуваше поддршката за демонстрациите, како што беше случај во ноември кога објави фотографија без марама на главата со цел да искаже солидарност со демонстрантите.
Овие протести станаа еден од најсериозните предизвици за иранскиот режим кој дојде на власт за време на револуцијата во земјата во 1979 година. По егзекуцијата на Шекари, за која реагираше познатата актерка, Иран спроведе уште една, исто така, врз демонстрант.