Ова е првата егзекуција поврзана со антивладините протести во Иран што беше јавно објавена од државните медиуми
Според Амнести интернешнал, иранските власти бараат смртна казна за најмалку 21 лице во врска со протестите, велејќи дека „властите ја користат смртната казна како алатка за политичка репресија за да се стави крај на народниот бунт“
Иран во четвртокот објави дека егзекутирал маж уапсен за време на антивладините протести кои ја зафатија земјата од септември годинава по смртта на 22-годишната Махса Амини која беше уапсена од таканаречената полиција за морал поради несоодветното носење хиџаб.
Си-ен-ен, повикувајќи се на иранските новински агенции, објави дека погубениот демонстрант именуван како Мохсен Шекари бил осуден за „водење војна против Бог“ за наводен напад со нож на паравоен службеник за безбедност и блокирање на улица во Техеран за време на протестите во септември.
Шекари бил осуден на смрт на 23 октомври, а погубен со бесење на 8 декември.
Ова е првата егзекуција поврзана со антивладините протести во Иран што беше јавно објавена од државните медиуми.
Непрофитна организација „Иран за човекови права“ повика на силен меѓународен одговор на егзекуцијата.
„Во спротивно, ќе се соочиме со секојдневни егзекуции на демонстранти кои протестираат за нивните основни човекови права“,
изјавил директорот на организацијата Махмуд Амири-Могадам за Си-ен-ен.
Неколку европски влади меѓу кои владата на Германија, на Франција и на Велика Британија остро го критикуваа Иран за егзекуцијата на мажот обвинет за ранување на член на паравоена група.
Според Амнести интернешнал, иранските власти бараат смртна казна за најмалку 21 лице во врска со протестите, велејќи дека „властите ја користат смртната казна како алатка за политичка репресија за да се стави крај на народниот бунт“.
„Иранските власти мора веднаш да ги поништат сите смртни казни, да се воздржат од барање на наметнување смртна казна и да ги отфрлат сите обвиненија против уапсените во врска со нивното мирно учество во протестите“,
се вели во извештајот на Амнести интернешнал.
За немирите во земјата, Иран ги обвини своите меѓународни непријатели, вклучувајќи ги и САД.