Кабинетот на ирачкиот премиер Мохамад Шија ал-Судани ги осуди нападите како „нова агресија против суверенитетот на Ирак“
Ирачките власти денеска соопштија дека 16 лица загинале, меѓу кои и цивили, а 25 се ранети во американските воздушни напади, извршени во текот на ноќта врз проирански цели во Ирак, пренесуваат агенциите, истовремено пренесувајќи ја пораката на американскиот претседател Џозеф Бајден дека нападите ќе продолжат во моменти и места по избор на Америка.
Кабинетот на ирачкиот премиер Мохамад Шија ал-Судани ги осуди нападите како „нова агресија против суверенитетот на Ирак“, негирајќи дека владата во Багдад однапред ги координирала со Вашингтон, нарекувајќи ги таквите тврдења „лаги“.
Соединетите Држави извршија напади во текот на ноќта во Ирак и Сирија врз повеќе од 85 цели поврзани со иранскиот корпус на револуционерната гарда (ИРГЦ) и проиранските милиции, соопшти претходно американската војска.
Акцијата на американските сили следеше откако милитантите, за кои САД тврдат дека се поддржани од Иран, убиле тројца и раниле 40 американски војници во Јордан.
„Нашиот одговор започна денеска. Ќе продолжи во време и на места што ќе ги избереме“,
предупреди американскиот претседател Џозеф Бајден, пренесува АП.
Во соопштението на американската војска се вели дека погодила цели како што се командни и контролни центри, капацитети за складирање на ракети, проектили и беспилотни летала и објекти за логистика и синџир за снабдување со муниција.
Целта на САД беа силите Кудс, огранок на ИРГЦ за воена шпионажа и паравојска, кои силно влијаат на милициите сојузници на Иран низ Блискиот Исток, од Либан до Ирак, Јемен и Сирија, соопшти американска војска.