Заедно со инженерските на Армијата на РСМ, тие ќе работат на подобрување на инфраструктурата на Криволак
Инженерски единици од вооружените сили на САД ќе дојдат во земјава за да учествуваат во подготвувањето на армискиот полигон Криволак за меѓународната вежбовна активност „Одлучен удар 21“.
Ваква одлука за влегување на американските инженери донела Владата на денешната седница.
Припадниците на 15. инженерски баталјон од американските сили во Европа треба да пристигнат во нашата земја во текот на овој месец и заедно со инженерските на Армијата на РСМ ќе работат на подобрување на инфраструктурата на полигонот Криволак, кој е наш најголем вежбовен капацитет и воедно капацитет на НАТО.
Подготовките на Криволак се вршат во пресрет на вежбата „Одлучен удар 21“ која ќе се одржи на крајот на пролетва, како дел од серијата вежби „Defender Europe 21“ („Бранител Европа 21“), на која ќе учествуваат над 2 000 војници на армиите на Северна Македонија, САД, Бугарија и на Грција.