„Доколку се анализираат податоците од електродистрибуција за потрошувачката на електрична енергија на Владата, административните објекти на министерствата, кабинетот на претседателот на државата, на Собранието, на ЕСМ и МЕПСО, заштедата на електрична енергија изнесува 25 отсто. Шест субјекти имаат намалена потрошувачка, но немаат остварено заштеда од 15 отсто, додека останатите се над тој процент. Единствено зградата на Министерството за локална самоуправа има зголемена потрошувачка на електрична енергија, споредено со истиот месец минатата година“, рече Бектеши на прес-конференција
Владата, зградите на министерствата, Собранието, дел од институциите, резиденцијата на претседателот на државата, судовите, ЕСМ и МЕПСО минатиот месец заштедиле 20 отсто електрична енергија во споредба со истиот месец минатата година, информира денеска на прес-конференција министерот за економија Крешник Бектеши.
Владата на 16 август по препорака на Министерството економија донесе сет мерки чија цел е да се заштеди електрична енергија за побезбедно да се помине зимата, а во рамките на актуелната енергетска криза. Мерките стапија во сила на 1 септември, а ќе траат до 31 март 2023 година.
Мерките се однесуваат на домаќинствата и компаниите само како препораки, додека пак за државните институции тие се задолжителни.
Минималната заштеда што треба да остварат државните институции изнесува 15 отсто.
Според податоците што Бектеши ги соопшти на денешната прес-конференција, најголем дел од државните институции оствариле заштеда на струја над минималниот праг, а некои го надминале повеќекратно, како што е примерот со Министерството за култура кое заштедило 40 отсто електрична енергија.
„Доколку се анализираат податоците од електродистрибуција за потрошувачката на електрична енергија на Владата, административните објекти на министерствата, кабинетот на претседателот на државата, на Собранието, на ЕСМ и МЕПСО, заштедата на електрична енергија изнесува 25 отсто. Шест субјекти имаат намалена потрошувачка, но немаат остварено заштеда од 15 отсто, додека останатите се над тој процент. Единствено зградата на Министерството за локална самоуправа има зголемена потрошувачка на електрична енергија споредено со истиот месец минатата година“,
рече Бектеши на прес-конференцијата.
Според податоците што ги соопшти министерот, во зградата на Владата заштедата е 25 отсто, во Министерството за внатрешни работи 21 отсто, во Министерството за култура 40 отсто, Министерството за образование и наука 35 отсто, во Министерството за политички систем 22 отсто, во транспорт и врски 30 отсто, во Министерството за труд и социјална политика 36 отсто, Министерството за финансии заштедило 32 отсто струја, Министерството за економија 30 отсто, Собранието, како што информираше Бектеши, има заштеда од 29 отсто, додека кај кабинетот на претседателот на државата заштедата е 17 отсто.
Најмалку штедливи биле во Министерството за здравство, кое потрошило само два отсто помалку струја во споредба со истиот месец лани. И МНР е под минималниот праг од 15 отсто, односно во септември Министерството за надворешни работи заштедило осум отсто помалку струја во споредба со истиот месец, а идентична заштеда изразена во проценти е регистрирана и кај Министерството за одбрана.
Што се однесува до претпријатијата во државна сопственост вкупната заштеда е под пропишаниот минимум и изнесува осум отсто.
„Девет субјекти оствариле заштеди од минимум 15 отсто, пет субјекти оствариле заштеда помалку од 15 отсто. Два субјекти имаат поголема потрошувачка на електрична енергија, едниот за 10 отсто, а другиот и над 50 отсто. Субјектот кај кој е забележана поголема потрошувачка е Јавното претпријатие ‘Водостопанство Македонија’“,
соопшти министерот за економија.
Анализата покажува дека вкупно 11 институции немаат потпишано договор за снабдување со електрична енергија и се снабдуваат на краен снабдувач со многу повисока цена. Најголем број субјекти кои се снабдува од снабдувач во краен случај се основните и средните училишта, по што следуваат одредени министерства и здравствените установи.
Општините, кои исто така имаат препораки да внимаваат на потрошувачката на електрична енергија, како што информира Бектеши, сумарно ја намалиле потрошувачката за 29 отсто.
„Од 81 општина, 25 не постигнале заштеда на електрична енергија од 15 отсто, додека преостанатите имаат остварено заштеда од 15 отсто“,
рече Бектеши.
Како што додаде тој, општините кои најмалку заштедиле се: Арачиново, Гостивар и Свети Николе.
Министерот за економија истакна дека овие податоци за заштеда на струја покажуваат дека доколку сме рационални и не трошиме струја беспотребно можат да се направат големи заштеди.
„Секој со свој личен влог може да помогне со најмали можни последици да се справиме со енергетската криза. Состојбата не само во Северна Македонија туку и во Европа не е шега. Грејната сезона започна и треба сите ние да се фокусираме на штедење и начините како да го направиме тоа. Една мала промена во секојдневните навики може да направи голема промена“,
порача Бектеши.
Според мерките на Владата, исклучување на декоративното осветлување на фасадите на јавните објекти и културните споменици, гаснење светилките кога има доволно дневна светлина, ладење со клими не помалку од 27 степени и греење на максимум 20 степени, исклучување на компјутерите по завршување на работните обврски, редовно менување на филтрите на грејните тела и клима уредите, печатење само на потребните материјали, замена на прозорците со енергетски ефикасни, се само дел од обврските кои државните институции мора да ги спроведат.