Според најновите податоци на Евростат, балтичките земји забележаа највисоки годишни стапки на инфлација во јули, а Естонија повторно имаше највисока, од 22,7 отсто. Во Летонија и Литванија тие достигнуваат 21 и 20,8 отсто. Најниска инфлација, пак, има Малта, односно 6,5 отсто
Главната причина за силното забрзување и понатаму е порастот на цените на енергенсите, предизвикан од војната во Украина и санкциите против Русија поради инвазијата на соседната земја, како и неизвесностите во однос на снабдувањето со гас
Поради континуираниот раст на цените на храната и енергијата, инфлацијата во еврозоната во јули достигна нов рекорд од 8,9 отсто, покажуваат проценките на Евростат.
Растот на потрошувачките цени во 19 земји од еврозоната силно забрза во јули на годишно ниво, на 8,9 отсто, од 8,6 отсто во јуни, според првата проценка на Европската статистичка служба.
Главната причина за силното забрзување и понатаму е порастот на цените на енергенсите, предизвикан од војната во Украина и санкциите против Русија поради инвазијата на соседната земја, како и неизвесностите во однос на снабдувањето со гас.
Цените на енергијата во последниот месец во еврозоната беа за 39,7 отсто повисоки во однос на истиот месец минатата година, по 42 отсто пораст во јуни.
Првите проценки на Евростат покажуваат дека цените на храната продолжуваат значително да растат, па така, во јули биле за 11 отсто повисоки од истиот период лани, а речиси за истиот процент беа зголемени и минатиот месец.
Кога се исклучени високо нестабилните цени на енергијата и храната, годишната инфлација забрза на пет отсто во јули, од 4,6 отсто еден месец порано.
Балтичките земји забележаа највисоки годишни стапки на инфлација во јули, а Естонија повторно имаше највисока, од 22,7 отсто. Во Летонија и Литванија тие достигнуваат 21 и 20,8 отсто.
Половина од земјите во еврозоната имаат двоцифрени годишни стапки на инфлација, а во опсег од 10 до 20 отсто највисока бележи Словачка – 12,8 отсто. Блиску се и Словенија, Холандија и Грција со инфлација од околу 11,6 отсто.
Инфлација пониска од 10 отсто е забележана во Ирска, 9,6 отсто и Португалија со 9,4 отсто. Следуваат Луксембург и Австрија со раст на потрошувачките цени од 9,3 отсто на годишна основа.
Германија и Италија, прва и трета по големина економија, според првичните проценки бележат инфлација од 8,5, односно 8,4 отсто.
Најниска инфлација, пак, има Малта, односно 6,5 отсто.