Здравствените власти ги зајакнаа мерките за превенција од коронавирус по состојбата во Италија
Состојбата со коронавирусот во Италија го подигна нивото на подготвеноста на здравствените власт во земјава. Причина е ширењето на вирусот во областите Лобардија, Венето и Емилија-Ромања, каде што живеат голем број наши граѓани.
*Поврзана вест МНР: Во Италија нема заболени наши граѓани од коронавирус
Подигнувањето на нивото подразбира зајакната контрола на сите гранични премини и на двата аеродрома, каде што ќе има посебни простории за интервјуирање на сите патници кои доаѓаат од ризичните дестинации и ќе се врши првичен скрининг на нивната здравствена состојба.
Промени има и на скопскиот аеродром, каде што термалната камера, која досега ги скенираше само патниците од Дубаи и Истанбул, сега ќе ги следи сите патници што пристигнуваат. На аеродромот во Охрид, пак, скринингот на сите патници, без разлика од која дестинација доаѓаат, ќе се прави со бесконтактен пиштол за мерење на телесната температура.
Тестирањата на сомнителни случаи ќе се вршат на инфективните клиники во Скопје и во Куманово.
А, она што е најново, е дека Инфективната клиника во Штип ќе функционира како објект за изолација, односно карантин доколку има потреба за тоа.
За граѓаните, Министерството за здравство уште ги објави превентивните мерки за заштита:
• Да се воведе дополнителна заштита на храната – да не се консумира храна приготвена од болни животни;
• Да се воведе дополнителна заштита при приготвување на храната – да се користат различни садови и ножеви за приготвување и сечкање на сурова храна и да се мијат задолжително рацете по секое приготвување храна. При приготвување месо и јајца, треба убаво термички да се обработат;
• Да се воведе посебна заштита при работа на отворени пазари – задолжително носење заштитни опрема, ракавици, маски и мантили додека се извршуваат работи со животни или производи од животинско потекло, по употребата целата опрема да се извади и да се пере секојдневно. Да се внимава да се заштити семејството од неиспрана работна опрема;
• Да се штити населението од настинки – да се избегнува незаштитен контакт со болни (вклучувајќи и допир на уста, нос и очи), како и незаштитен контакт со домашни или диви животни;
• Задолжително и често миење на раце – и кога не се видливо нечисти да се мијат рацете со сапун и вода или да се користи чистач за раце кој содржи алкохол;
• Заштита на останатите од заболување – при кашлање или кивање да се заштити устата и носот со марамче или со дланката. По употреба марамчињата да се фрлаат во затворени канти. При кашлање или кивање, како и при грижа за болни задолжително да се мијат рацете;
Зајакнатите превентивни мерки ќе бидат координирани на денешниот состанок со Центарот за управување со кризи (ЦУК) во Министерството за внатрешни работи, попладнево.
Според најновите информации од Италија, регистрирана е и петтата жртва од вирусот, а бројот на заразени е 219 лица.
*поврзана вест ЕК: Ситуацијата со коронавирусот предизвикува загриженост, но не се планираат ограничувања при патувања