Еврокомесарот за хуманитарна помош Јанез Ленарчич апелира да не се политизира ситуацијата
Драстичните мерки на италијанските власти за коронавирусот предизвикаа паника кај голем дел од европското население, но Европската комисија не планира да воведе ограничувања на патувањата во шенген-зоната.
„Одблизу ја следиме ситуацијата во Италија, овој брз развој на настаните покажува колку бргу се менуваат работите. Ситуацијата во Италија предизвикува загриженост и покажува колку е важно земјите членки на ЕУ да бидат подготвени доколку се појави слична ситуација“, изјави утрово европската комесарка за здравство Стела Кириакидис.
*Поврзана вест: Четврта жртва на ковид-19 во Италија
Во Италија, последните случувања послужија и како политичка платформа за популисти како поранешниот министер за внатрешни работи Матео Салвини, кој повика на спречување на миграцијата, патувањата и воведување гранични контроли во шенген-зоната.
„Би било многу жално оваа ситуација да се политизира. Она што е сега потребно кога се дискутира за мерките, вклучително и граничните контроли, е тие да се засноваат на кредибилни процени на ризикот и на научни докази, мерките треба да бидат пропорционални и да се носат во координација со другите земји, треба да настапиме како заедница“,
изјави на прес-конференција еврокомесарот за хуманитарна помош Јанез Ленарчич.
Засега од Светската здравствена организација нема нови препораки во однос на рестрикција на патувањата и движењата во Европската Унија.
Секоја земја членка одлучува за себе какви мерки сака да воведе, додека институциите на ЕУ се задолжени за препораки за своите вработени. Европската комисија уште во јануари им препорача на вработените да ги откажат сите патувања во и од Кина, Макао и Хонгконг доколку не се неопходни.
Здравствено-безбедносниот комитет на ЕК утрово одржува седница на која се разгледуваат последните случувања во Италија и по која ќе бидат информирани медиумите дали се планираат нови мерки или нови препораки до земјите членки.
Комесарот Ленарчич повтори дека оваа епидемија несомнено ќе има последици врз глобалната економија и трговија, но дека во овој момент врвен приоритет е здравјето на граѓаните и сите мерки треба да се носат согласно тој приоритет.
Европската комисија денеска најави и нова финансиска помош за справување со заразата од ковид-19 во износ од 232 милиони евра: 114 милиони се наменети за поддршка на СЗО, 15 милиони се наменети специфично за помош на африканскиот континент, 100 милиони за медицински истражувања и вакцини и конечно три милиони евра за репатријација на лица од Кина.
„Со над 2 600 изгубени животи, немаме друг избор освен да се подготвиме на секое ниво, нашата нова помош ќе ѝ помогне на Светската здравствена организација да осигури дека земјите со послаби здравствени системи нема да бидат изоставени, нашата цел е да се спречи епидемијата на глобално ниво“, изјави комесарот Ленарчич.