Илир Демири е нов директор на болницата во Тетово

Министерот за здравство Фатмир Меџити денеска за нов директор на Клиничката болница во Тетово го назначи д-р Илир Демири. Тој доаѓа од Клиниката за инфективни болести и фебрилни состојби, каде што работеше како координатор за Ковид-19 центарот. Демири е специјалист инфектолог кој на Инфективната клиника работи од 2004 година. Од 2007 година е асистент по предметот Инфективни болести на Медицинскиот факултет во Скопје, а во 2020 година се стекнува со титулата примариус доктор.

„Новиот директор на Клиничката болница Тетово е истакнат професионалец и еден од најпосветените здравствени работници кој се бореше против ковид-19 од самиот почеток на пандемијата. Доктор Демири е добитник на наградата ’Европска личност за 2020 година’. Оваа титула се доделува на лица кои имаат посебен придонес во афирмацијата на хумани вредности, а ја доделува Европското движење и е признание што доаѓа од страна на граѓаните“,

соопшти Министерството за здравство.

Демири е член на Македонското здружение за инфективни болести, како и на Комисијата за заразни болести.

Плумб Вела се повлече од директорската позиција во тетовската болница и од шеф на огранокот на Алијанса, вели од лични здравствени причини

Демири на функцијата доаѓа на местото на доскорашниот директор Плумб Вела кој минатата недела поднесе оставка од, како што наведе, лични причини.