Во оваа измината недела регистрирани сe 2 504 нови позитивни случаи од 34 града во државата, со намалување од 32,3% во однос на претходната недела, на тестирани и тоа за 9,4% и на смртни случаи за 35,3% помалку во однос на претходната недела
Во периодот од 28 февруари до 6 март Институтот за јавно здравје (ИЈЗ) регистрира продолжување на трендот на опаѓање на бројката на заразени со коронавирус, на починати и на реинфекции за повеќе од 30 отсто.
Исто така се намалува и бројката на тестирани и тоа за 9,4%.
Во оваа измината недела регистрирани сe 2 504 нови позитивни случаи од 34 градови во државата, со намалување од 32,3% во однос на претходната недела (n=3.701), а процентот на позитивност се движи од 9,4% до 18,4%, просечно 14,0%.
Според неделниот извештај на Институтот за јавно здравје тестирани се вкупно 17 416 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со намалување од 9,4% во однос на минатата недела.
Најголем дел од регистрираните случаи се од Скопје (n=1.418; 56,6%), а највисока неделна инциденца е регистрирана во Кавадарци – 389,4/100 000, Скопје – 312,7/100 000 и Демир Капија – 308,6/100 000.
Регистрирани се заболени лица во сите возрасни групи. Најзастапена е возрасната група на лица на возраст над 60г (n=705, 28,2%). Најмал број е регистриран кај возрасната група од 0-9 години (n=103; 4,1%).
Во однос на претходната недела, се забележи намалување на бројот на заболени кај сите возрасни групи, со најзабележително намалување од 46,9% во возрасната група од 0-9 години.
Согласно новиот алгоритам за оздравување во текот на минатата недела со статус „оздравени“ се стекнале 3 511 лица во хоспитализирани услови или на домашно лекување.
Во текот на минатата недела вкупно се пријавени 372 реинфекции, со намалување за 31,5% во однос на претходната недела.
Пријавени се 44 смртни случаи во 17 градови во текот на изминатата недела, за 35,3% помалку во однос на претходната недела. Најголем дел од нив се од Скопје (17). Во однос на возраста, најголем број (n=42; 95,5%) од починатите припаѓаат на возрасната група над 60 години, а регистрирани се починати лица и кај возрасната група од 40-49 години (1) и 30-39 години (1).
Заклучно со 05.03.2022, вакцинирани се вкупно 871 082 лица со барем една доза на вакцина против COVID-19 во државата и странство. Комплетно вакцинирани (со две дози) се вкупно 850 803 лица, а со трета доза се вакцинирани 144 391 лица.