Македонскиот државјанин, кој е еден тројцата наши граѓани на бродот „Дајмонд принцес“, закотвен во пристаништето во јапонскиот град Јокохама кај кој е потврден коронавирус, има блага форма на заболувањето и е транспортиран во болница во градот, информира денеска д-р Гордана Кузмановска од Институтот за јавно здравје.
Таа рече дека за тројцата наши граѓани што се на бродот во пристаништето во Јокохама редовно комуницираат преку меѓународниот здравствен правилник со своите колеги од Јапонија.
„Тие редовно нè известуваат на два дена каква е нивната здравствена состојба и дали има промени или во статусот на позитивност или негативност. Добивме информација дека еден од нив е позитивно тестиран на коронавирусот. Се работи за блага форма на заболување, меѓутоа со оглед на рутинските процедури, овој наш граѓанин е транспортиран во болница во Јокохама и таму е на лекување“,
потенцира д-р Кузмановска.
Во меѓувреме, јапонското Министерство за здравство соопшти дека уште 44 лица на крузерот „Дајмонд принцес“ се заразени од новиот коронавирус. Со тоа бројот на заболени на бродот, на кој во карантин се повеќе од 3.500 патници и членови на екипажот, се зголемил на 218, од 713 лица колку што досега се тестирани.
*Поврзана вест
МНР: Еден од македонските државјани на крузерот во Јапонија е заразен со коронавирус и е во болница