Лидерот на СДСМ, Зоран Заев, на прес-конференција предмалку порача дека изборите треба да се одложат поради состојбите со коронавирусот.
Тој рече дека тоа е партиски став кој е донесен синоќа и најави дека ќе побараат претседателот Стево Пендаровски да повика лидерска средба за одложување на изборите, а ако тој не го направи тоа, средба ќе свика СДСМ.
„Ризикот од одржување на изборите ја прави понепријатна состојбата, со помислата дека треба да се оди на избирачки места каде што граѓаните би биле изложени“,
рече Заев повикувајќи партиите да изградат заеднички став за одложување на изборите.
Кога би се одржале изборите, рече тој, исто така, партиите треба да се договорат, но тоа зависи од многу фактори, пред сè од тоа како ќе се одвива ситуацијата со коронавирусот.
Пред околу половина час и лидерот на ВМРО-ДПМНЕ, Христијан Мицкоски, преку социјалните мрежи најави дека ќе бара одложување на изборите, како и лидерска средба кај Пендаровски.
Мицкоски ќе се обрати и на прес-конференција закажана во 12:30 часот.