Случајот „Еразмус“ за примање поткуп на Економскиот факултет во Скопје, во кој се обвинети неколку професори и демонстратор, формално ќе се врати на почеток затоа што поротник, кој е дел од судечкиот совет, ќе оди на печалба во Германија.
Како што беше посочено на денешното рочиште, тој добил работна виза и за седум дена ќе замине од земјава. Случајот е пред самиот крај – денеска требаше да се почне со заврши зборови, а во февруари да се изрече пресуда, но периодот од седум дена е краток за странките да ги кажат завршните зборови, а судот да ги анализира доказите и да изрече пресуда.
Заминувањето на поротникот ќе значи и промена во составот судечкиот совет, а тоа подразбира и враќање на судскиот процес на почеток. Меѓутоа, судијата Владимир Туфегчиќ денеска предложи за да не се одолговлекува процесот, кога ќе биде назначен новиот поротник, да не се изведуваат доказите одново, туку само да се прочитаат и потоа странките да ги дадат завршните зборови, на што се согласија и странките.
Во случајот „Еразмус“ првообвинет е професорот и поранешен декан на Економскиот факултет, Бобек Шуклев, како и професорите Славе Ристевски, Драги Јанев и Стојан Дебарлиев. Шуклев и Ристевски се товарат за примање поткуп, Јанев за примање поткуп и примање награда за противзаконито влијание, Деварлиев за злоупотреба на службената положба и овластувања, а демонстраторот за давање поткуп.
Во истрага за овој предмет првично беше опфатен и професорот и академик Таки Фити, но обвинителството ја запре истрага за него бидејќи немаше доволно докази.