Граѓанската „Иницијатива О2“ дава поддршка и се приклучува кон барањето да се повлече Деталниот урбанистичкиот план (ДУП) Мал ринг и да се врати на доработка и разгледување.
„Се повторува праксата клучни Детални Урбанистички планови како ДУП Мал Ринг да се протнуваат во летен период, во услови на пандемија која секојдневно зема жртви. Кога фокусот е сосема на друга страна најлесно си функционира бизнис коалицијата без разлика кој е на власт и кој од која партија е, соработка си има кога е личен интерес во прашање, јавниот е само за пред избори“,
посочуваат од таму преку допис нивниот профил на Фејсбук.
Иницијативата за повлекување на ДУП-от ја покрена советничката во Општина Центар, Јана Белчева-Андреевска.
Во барањето до градоначалникот на Центар, Советот и Комисијата за урбанизам, меѓудругото, таа посочува дека поразително е што во предложениот план се наоѓаат објекти и земјишта кои се законски спорни, а дел од нив беа предмет на процеси и обвиненија на СЈО, како и на истражувачки лаборатории и студии: Шпански скали, меморијалниот објект Мајка Тереза, катната гаража во зеленилото зад Собрание и Дом на АРМ, сите споменици од Скопје 2014, објектите во коритото на Вардар…