Точно еден месец откако претходната (политичка) влада ја номинираше министерката за правда за членка во Венецијанската комисија, лидерот на ВМРО-ДПМНЕ денеска обвини за конфликт на интереси и ја повика Антикорупциската комисија да реагира
Министерката за правда Рената Тренеска-Дескоска, исто така, смета дека Антикорупциската комисија треба да поведе постапка за нејзиното именување за членка на Венецијанската комисија. Откако лидерот на ВМРО-ДПМНЕ, Христијан Мицкоски, ја прозва денеска ДКСК да испита дали има судир на интереси во случајот со министерката за правда, Дескоска во изјава за „360 степени“ вели дека и таа ја повикува Комисијата да го истражи случајот.
„И јас ја повикувам Антикорупциската комисија да се произнесе за случајот. Не постои конфликт на интереси бидејќи станува збор за ангажман во странство кој не потпаѓа под одредбата за забрана за вршење две функции, туку станува збор за претставување на земјата во комисија на Советот на Европа. И мојот случај не е единствен“,
вели Дескоска.
Точно еден месец откако претходната (политичка) влада ја номинираше министерката за правда за членка на Венецијанската комисија, лидерот на ВМРО-ДПМНЕ денеска обвини за конфликт на интереси и ја повика Антикорупциската комисија да реагира.
Обвинувања
Одговарајќи на новинарско прашање, Мицкоски рече дека изборот на Дескоска е скандалозен, при што цитираше конкретен член од Законот против корупција. Тој ја критикува и ДКСК дека не одржува седници и дека најчесто отвора случаи против него.
„Тоа е скандалозно само по себе. Ние и тогаш го коментиравме тоа што не отстапи од министерската позиција. Ако го погледате Законот против корупција во членот 44 став 2, ќе видите дека тоа е недозволено и дека има сериозен конфликт меѓу лице кое е веќе избрано од страна на Владата или Собранието за потоа од истата Влада да биде предложено на друга функција. Замислете, човек кој себеси се нарекува врвен европски познавач на правото прави правен фаул за себе. И ние сега треба да имаме доверба во овој предлог што таа како орган во Министерството што го има го предлага. Мислам тоа е навистина надвор од каква било логика. Кога самата го прекршува законот“,
изјави Мицкоски.
Тој ја повика ДКСК да реагира по допрен глас, изнесувајќи претпоставка дека Комисијата ќе се ангажира повеќе во предизборниот период.
„Веќе неколку месеци таму не одржале седница. Претпоставувам сега ќе се интензивираат пред изборите и наеднаш ќе има наплив на седници во ДКСК. Но на тие седници најчесто ќе бидат случаи против мене или против ВМРО-ДПМНЕ. Еве, ги охрабрувам по овој допрен глас да одржат седница и да истражат дали е во конфликт со Законот за антикорупција, односно спречување на корупција себеноминирањето на избран функционер од истата таа влада за претставник во Венецијанската комисија. Нека го истражат тоа и нека излезат. Ако сум јас во грешка, ако сме ние во грешка, тогаш ќе имаме доблест да признаеме. Но, ако не сме во грешка, тогаш да видиме конечно некаква одговорност. Еве, сега сум убеден дека ќе ги засилат состаноците, иако неколку месеци нема никаква активност во таа Комисија“,
рече Мицкоски.
Примери
Претседателката на ДКСК Билјана Ивановска за „360 степени“ денеска изјави дека не ја слушнала изјавата на Мицкоски, но дека ќе ја има предвид и дека Комисијата ќе се произнесе дали има потреба да се поведе иницијатива за случајот со Дескоска.
Министерката за правда, со одлука на Владата, беше номинирана за членка на Венецијанската комисија кон крајот на декември минатата година. Таа тогаш објави на Фејсбук дека и во други држави е практика функционери од извршната власт да се номинираат за членови во Венецијанската комисија.
„Се надевам дека од јануари, по истекот на мандатот на постојниот член на Венецијанската комисија, ќе можам да придонесам за целосно хармонизирање на нашето законодавство со европското. Земјите што често праќаат закони на мислење до Венецијанската комисија избираат да номинираат за свои претставници министри, заменици министри или државни секретари, доколку истите ги исполнуваат условите, заради подиректна соработка со комисијата и целосна и искрена размена на ставови. Таков е примерот на Црна Гора која за свои претставници ги има министрите за правда и за надворешни работи, Србија чиј претставник е заменик министерот за правда, Романија, Унгарија… Секако, во моментов одлуката на Владата е само номинација“,
напиша Дескоска на Фесбук.
Актуелната министерка за правда е професорка по уставно право на Правниот факултет во Скопје. Таа беше избрана на чело на Министерството за правда при првата реконструкција на владата на СДСМ, каде што претходно беше министерка за образование.
Членовите на Венецијанската комисија во Советот на Европа се избираат на предлог на министерствата за правда, од редот на професорите по уставно и меѓународно право, парламентарци и државни службеници. Мандатот на членовите е четири години, со неограничено право на реизбор.
Деновиве ѝ завршува мандатот на досегашната членка на Венецијанската комисија Тања Каракамишева, исто така од Правниот факултет во Скопје, од каде што беше и нејзината претходничка во ова советодавно тело на Советот на Европа – професорката Гордана Силјановска. Венецијанската комисија, главно, се занимава со уставни и изборни прашања, како и со прашања кои се однесуваат на функционирањето на демократијата и дава правни совети за приспособувањето на домашната легислатива со европската. Ова тело моментно е актуелно во земјава поради Законот за употреба на јазиците, кој беше дел од преткоалицискиот договор на СДСМ и на ДУИ, а сега стана причина за разногласие меѓу коалициските партнери во врска со тоа како треба да се третираат забелешките на експертите на Советот на Европа.