Членови на ВМРО-ДПМНЕ од скопската населба Аеродром излегоа со поддршка за иницијативата за одржување вонреден конгрес на партијата и тврдат дека поддршката за оваа идеја во нивниот Општински комитет (ОК) е голема. Меѓу нив, велат, има членови на ОК, претседатели на месни комитети и обични активисти.
„Меѓу нас има членови на општинскиот комитет, претседатели на месни комитети, како и обични активисти. Поддршката на идејата за свикување вонреден конгрес во ОК Аеродром е голема. „Партијата е во очајна состојба. ВМРО-ДПМНЕ никогаш не била послаба. Никогаш во историјата на партијата немало ваква разединетост, помеѓу членовите, како и меѓу членовите и раководството. Ова се само дел од причините поради кои решивме јавно да проговориме и да се обидеме нашиот глас да стигне до раководството на партијата. Раководството е целосно дистанцирано од комитетите и членството како да се затворени во стаклено ѕвоно“,
изјави Јоаким Димулков, член на ВМРО-ДПМНЕ од Аеродром.
Ако не се преземат први чекори и не се преиспита правецот во кој се движи партијата, вели тој, постои реална опасност партијата да западне во уште поголема криза.
Се надеваме, рече Димулков, дека претседателот Христијан Мицкоски ќе ја прифати идејата за вонреден конгрес.
Од ОК Аеродром, пак, се оградија. Тие на Фејсбук споделија став на претседателот Дејан Митески тврдејќи дека тоа не е став на ОК и не претставува волја на мнозинството членови на ВМРО-ДПМНЕ во Аеродром.
Митески во објавата пишува и дека видеото од прес-конференцијата на дел од членството било снимено тајно пред просториите на ОК.
„Моите информации говорат дека од два обида, изјавата што денес се пушта е скришно снимена вчера. Тоа говори дека немаат поддршка и дека целта е да се окупира јавноста со други теми додека Аеродром, Скопје и Македонија тонат. Можеби вистинското место на ваквата изјава е пред зградата пред ‘Мајчин дом’ каде што поранешниот градоначалник Конески се говори дека има деловен простор, исто како и кумот на градоначалникот Марин, или пред хотелот во центарот на градот од каде се добиваат ваквите инструкции. Со хотелски коалиции власт не се добива, туку со чесна работа и искреност спрема граѓаните. Ќе потсетам дека ОК на ВМРО-ДПМНЕ Аеродром заедно со сите чесни граѓани кои работеа имаше убедлива победа на последните два изборни циклуси, на претседателските и парламентарните избори“,
напиша Митески на Фејсбук.
Тој вели дека е заедно со Мицкоски и ќе ѝ донесат уште една убедлива победа на партијата.
Вчера, пак, во име на Иницијативниот одбор за одржување на вонреден конгрес, прес-конференција одржа поранешниот градоначалник на Дојран, Борче Стамов, кој порача дека Мицкоски не донел ниту една победа и нема причина да биде привилегиран пред Љупчо Георгиевски и Никола Груевски, кои се повлекоа по првиот пораз на избори.
Дел од овој иницијативен одбор е и поранешниот градоначалник на Аеродром, Ивица Коневски.
*Поврзани вести:
Членови на ВМРО-ДПМНЕ со иницијатива за вонреден конгрес на партијата и оставка од Мицкоски
И Ивица Коневски бара промени во ВМРО-ДПМНЕ
Ѓорѓиевски: До ВМРО-ДПМНЕ нема барање за вонреден конгрес, ако стигне, ќе го разгледаме