Најголемата опозициска партија ја обвинува Мерсиха Смаиловиќ (од неодамна членка на комисија на СДСМ) за говор на омраза и антисемитизам, а таа вели дека е цел на медиумска пропаганда и дека нејзините ставови никогаш нема да бидат во контекст на антисемитизам
ВМРО-ДПМНЕ бара СДСМ да ја разреши активистката Мерсиха Смаиловиќ од членка на партиска комисија, поради, како што велат, ширење на говор на омраза и антисемитизам.
„СДСМ во паника од неминовниот изборен пораз шири говор на омраза и антисемитизам. Нападите на функционери на СДСМ кон министерката Рашела Мизрахи, на верска и национална основа, затоа што е Еврејка, е еклатантен пример за говор на омраза. Мерсиха Смаиловиќ, членка на Комисијата за труд и социјална политика на СДСМ, во стилот на нацистите на Хитлер, повика Рашела Мизрахи да биде обележана со Давидова ѕвезда затоа што е Еврејка“,
кажа денеска на прес-конференција пратеничката од ВМРО-ДПМНЕ Жаклина Пешевска.
Како почна сѐ
Приказната за наводното ширење на антисемитизам започна на “Фејсбук”, каде Смаиловиќ ја коментираше „популарната“ фотографија на техничката министерка за труд и социјална политика, Рашела Мизрахи, на која додека дава интервју (прво како министерка), во позадина се гледа знамето на ВМРО-ДПМНЕ.
Во една од репликите на статусот на Смаиловиќ на “Фејсбук”, се прави паралела меѓу чинот на Мизрахи и поставувањето на албанското знаме во кабинетот на претседателот на Собранието, Талат Џафери, на што таа коментира:
„Тоа е знамето на албанската заедница во Македонија, а нејзиното е класично партиско. Да беше Давидова ѕвезда никому ништо!!!”
Коментарот на Смаиловиќ стана вест за некои портали.
По овие објави, на кои се надоврза прес-конференција на ВМРО-ДПМНЕ, Смаиловиќ реагираше на својот фејсбук-профил.
„Медиумската пропаганда против мене и моето семејство, со фабрикување лажни вести и ширење верска и етничка омраза, не стивнува. Вистината е дека моите ставови не се и никогаш нема да бидат во контекст на антисемитизмот, расизмот и ксенофобијата! Сè друго е лага и клевета. Коментарот е сè уште на мојот ѕид во рамките на дискусијата за оправданост на користење на знамиња на етничките заедници, а не на знамињата на политичките партии, и при тоа е многу јасен. Затоа, пред да се поверува на лажните информации, треба да се прочита убаво и да се провери вистината. Борбата со лажните вести доаѓа од нас самите, дали ќе кликнуваме или ќе одлучиме да игнорираме“, напиша Смаиловиќ.
Давидова ѕвезда
Давидовата ѕвезда, или Magen David, е симбол што се појавува уште во античко време. Во 17 век еврејската заедница во Прага е прва која ја презема оваа ѕвезда за свој официјален симбол. Потоа, и останатите еврејски заедници го прават истото за веќе во 19 век Давидовата ѕвезда да стане општо прифатен симбол на Евреите во светот.
Давидовата ѕвезда добива значење на стигматизација кога нацистите ги принудиле Евреите во Германија да носат жолта ѕвезда. Тоа значело исклучување од општеството и подготовка за Холокаустот. Во анализа на Дојче Веле се вели дека по обележувањето, Евреите биле депортирани во логорите на смртта.
Но, Давидовата ѕвезда денес е составен дел и од државното знаме на Израел. Претставена е во сина боја, на бела основа помеѓу две хоризонтални сини ленти.