Принцот Хари и Меган Маркл повеќе не смеа да ги користат титулите „високо кралско височество“, нема да добиваат државни пари како досега за нивните кралски должности, соопштија вечерва од Бекингемската палата.
Тие, на нивно барање, ќе ги вратат и парите кои ги добија за реновирање на нивната куќа која сепак, ќе остане нивен дом. Станува збор за сума од 2,4 милиони фунти (3,1 милион долари).
Во соопштението од Бекингемската палата се наведува дека Хари и Меган повеќе нема да може официјално да ја претставуваат кралицата, но двојката јасно ставила до знаење дека во нивните идни активности ќе бидат во духот на вредностите на Нејзиното височество.
Промените ќе стапат на сила пролетта 2020 година.
Покрај ова соопштение, објавена е изјава на кралицата Елизабета Втора во која таа вели дека е задоволна што на конструктивен начин успеале да се договорат за патот по кој ќе продолжи нејзиниот внук Хари со неговото семејство.
„Хари, Меган и Арчи секогаш ќе бидат многу сакани членови на семејството. Ги препознавам предизвиците со кои се соочија изминатите две години и ја поддржувам нивната желба за понезависен живот. Сакам да им се заблагодарам за сета нивна посветена работа низ целата земја, Комонвелтот и пошироко, а посебно сум горда на тоа што Меган толку бргу стана дел од семејството. Се надевам дека со договорот кој го постигнавме им овозможува да започнат да градат мирен и среќен нов живот“,
вели Елизабета Втора.
Постигнатиот договор во кралското семејство следува откако пред десетина дена принцот Хари и неговата сопруга Меган Маркл објавија дека ќе се повлечат од кралските должности и ќе работат на тоа да бидат финансиски независни, продолжувајќи да ја поддржуваат кралицата. Во објавата на Инстаграм, двајцата посочија дека одлуката ја донеле по многу месеци размислување и интерни разговори.
„Сега планираме да го балансираме нашето време меѓу Обединетото Кралство и Северна Америка, продолжувајќи да ја почитуваме нашата должност кон кралицата, Комонвелтот и нашите покровители. Овој географски баланс ќе ни овозможи да го израснеме нашиот син со почит кон кралската традиција во која е роден, а во исто време да му дадеме простор на нашето семејство да се фокусира на следното поглавје, вклучително и основање наш нов добротворен ентитет“,
напишаа Хари и Меган.
