Изјавата на Харадинај следува по вчерашните неуспешни преговори меѓу Белград и Приштина со посредство на ЕУ.
Поранешниот премиер и претседател на Алијансата за иднината на Косово, Рамуш Харадинај, побара Соединетите Американски Држави да го преземат дијалогот за нормализација на односите меѓу Косово и Србија.
„Изразувајќи благодарност до Европската Унија за олеснувањето на дијалогот, вистински момент е ЕУ да му го предаде дијалогот за конечен договор за меѓусебно признавање на Косово и Србија на претседателот Бајден“,
напиша Харадинај на Фејсбук.
Тој оцени дека претходниот дијалог не смее да се врати на разговор на исти теми, како и дека спроведувањето на редот и законот во целата земја треба да биде во согласност со Уставот и законите на Косово.
Харадинај додаде и дека Америка овој пат му дала поттик на процесот што го води ЕУ и помогнала и ја вратила нормалноста во дијалогот и односите меѓу Косово и Србија.
Изјавата на Харадинај следува по вчерашните неуспешни преговори меѓу Белград и Приштина со посредство на ЕУ во врска со неодамнешните тензии околу примената на реципроцитетните мерки на косовската влада за регистарските таблички и личните документи, која беше одложена за септември 1.
Високиот претставник за заедничка надворешна и безбедносна политика на ЕУ, Жосеп Борел, вчера изјави дека делегациите на Србија и Косово не постигнале договор во Брисел, но оти е договорено разговорите да продолжат наредните денови.