Хамас вчера го одложи ослободувањето на заложниците тврдејќи дека Израел ги прекршил условите за прекин на огнот
Американскиот претседател Доналд Трамп мора да запомни дека единствениот начин за израелските заложници да се вратат дома е да се почитува примирјето меѓу Израел и Хамас, изјави за Ројтерс високиот функционер на Хамас, Сами Абу Зухри.
„Трамп мора да запомни дека постои договор што мора да го почитуваат двете страни, и тоа е единствениот начин да се вратат заложниците. Јазикот на заканите нема вредност и само ги комплицира работите“,
рече тој.
Американскиот претседател Доналд Трамп доцна синоќа предупреди дека доколку сите Израелци кои се држат како заложници во Газа не бидат ослободени до сабота напладне, тој ќе предложи укинување на примирјето меѓу Израел и Хамас и ќе остави да „настане пекол“.
Хамас вчера го одложи ослободувањето на заложниците, тврдејќи дека Израел ги прекршил условите за прекин на огнот.
Хамас, израелските и арапските власти веќе предупредија дека прекинот на огнот е на точка на кршење, а радикалната интервенција на Трамп може да ги поттикне стравувањата дека Вашингтон нема намера да продолжи со фазниот договор.
Инаку, Трамп претходно изјави дека неговиот план за „преземање на Газа“ нема да вклучува право на враќање на повеќе од два милиони Палестинци за кои рече дека „немаат друга алтернатива“ освен да заминат поради уништувањето што го остави воената кампања на Израел.
Во првата фаза од прекинот на огнот, од трите планирани, вклучува прекин на огнот, ослободување на одреден број затвореници, повлекување на израелските сили од Газа и враќање на Палестинците во северниот дел на Газа, заедно со приливот на хуманитарна помош. Втората фаза предвидува прекин на огнот за период од 42 дена.
Во третата фаза Хамас треба да ги врати телата на загинатите заложници од Газа во Израел, а Израел треба да ослободи уште затвореници, со што треба да започне и петгодишниот план за реконструкција на Појасот.