Правилата и протоколите за влез во Грција воведени на 14 мај, кои важат и за македонските државјани, се продолжени до 7 јуни 2021 година, согласно новата министерска одлука објавена во Службен весник.
Тоа значи дека за влез кај јужниот сосед и понатаму е потребна една од следните три потврди: сертификат за вакцинација, негативен ПЦР тест или потврда за прележан ковид-19.
Исто така, оние кои патуваат во Грција се должни да пополнат формулар ПЛФ на веб-страна travel.gov.gr, најмалку 24 часа пред датумот на влез.
Од ревакцинацијата да се поминати 14 дена, ПЦР тест не постар од 72 часа
Важна напомена за граѓаните кои патуваат со сертификат за вакцинација е тоа што од ревакцинацијата треба да се поминати најмалку 14 дена. Ваквата потврда треба да ги содржи следните податоци: име и презиме – како што се заведени во пасошот; вид на вакцина и бројот на дози; датуми кога се примени вакцините.
Доколку граѓаните патуваат со негативен ПЦР тест, тој не треба да е постар од 72 часа. Исто како и за сертификатот, тестот треба да ги содржи и името и презимето на лицето кое патува, онака како што се заведени во пасошот.
Кога станува збор за третата опција – потврда дека го прележале вирусот, тогаш патниците треба да имаат доказ за дијагностициран ковид-19 со позитивен ПЦР-тест или потврда за присуство на антитела со важност од 2 до 9 месеци од датум на дијагностицирањето на болеста.
Која и да е од овие потврди, треба да биде издадена од сертифицирана јавна или приватна лаборатории, на англиски, француски, германски, италијански, шпански или руски јазик.
Како што е познато, постои опција и патниците по случаен избор да бидат тестирани и со брз тест на граница.
Овие услови не важат за децата под пет години.
Кон Северна Македонија отворен е само граничниот премин Евзони (Богородица) со работно време од 7 до 23 часот по локално, односно од 6 до 22 часот по македонско време.
По влезот, важат истите правила како и за грчките државјани
По влезот на грчка територија, за сите странски туристи важат истите правила и рестрикции кои се однесуваат и на грчките државјани, како што се задолжителна употреба на маска и на отворено и на затворено, забрана за движење по 00:30 часот поради полицискиот час, задолжително одржување дистанца итн.
За прекршување на законските мерки и обврски, предвидени се парични казни од 500 и 5 000 евра.
Грците дозволија влез и на државјаните на БиХ
Единствена промена во одлуката за продолжување на условите е што од утре е дозволен влез и на државјаните на Босна и Херцеговина.
На листата за дозволен влез од претходно, покрај ЕУ се наоѓаат и: Северна Македонија, Србија, Австралија, Обединетите арапски емирати, САД, Велика Британија, Израел, Канада, Белорусија, Бахреин, Нов Зеланд, Јужна Кореа, Катар, Кина, Кувајт, Украина, Руанда, Русија, Саудиска Арабија, Сингапур и Тајланд.