Уредбата со законска сила, со која граѓаните и фирмите во вонредната состојба ќе можат да добијат одложување на исплатата на рати за кредити, синоќа помина на владина седница, а денеска од Министерството за финансии и Народната банка излегоа со појаснување што значи таа и како ќе тече процесот.
Сега, банките и штедилниците, на засегнатите граѓани и фирми ќе можат да им понудат повеќе поволности, како одложување односно грејс-период за отплата на кредитите, пролонгирање на исплатата на кредитот на подолг период, пониска каматна стапка и сл.
Поволностите важат за сите кредитни производи: потрошувачки, станбени, хипотекарни, автомобилски кредити итн., кредитни картички, дозволено пречекорување (одобрен минус) и кредити на фирмите.
„Со Уредбата се овозможува промената на договорните услови за кредитите да се изврши побрзо и поедноставно, без да се загрози јавното здравје – без да се посетуваат експозитурите и филијалите и без да се чека во ред на шалтерите заради потпишување на анексите на договорите“,
појаснуваат во соопштението Министерството за финансии и Народната банка.
Банките и штедилниците можат да понудат поповолни договорни услови и без претходно да имаат добиено барање од засегнатите клиенти, и тоа преку објава на своите веб-страници со понуда за промена на условите за плаќање на кредитите или одделно известување на клиентите, преку електронска или писмена комуникација.
Со Уредбата, како што е наведено во заедничкото соопштение, е утврдено дека ако граѓаните кои имаат кредити, во рок од десет дена од објавувањето на веб-страницата или добивањето на понудата, писмено или електронски не ја извести банката дека го одбиваат понуденото олеснување на финансискиот товар, ќе се смета дека понудата за промена на договорните услови е прифатена.
За да ги искористат понудените поповолни договорни услови, фирмите, пак, ќе треба писмено или електронски да ја известат банката или штедилницата дека ја прифаќаат понудата. Ако правното лице не го стори тоа во рок од десет дена, во согласност со Уредбата ќе се смета дека понудата не е прифатена.
Од Министерството за финансии и Народната банка наведуваат дека секако останува и правото на граѓаните и фирмите да се обратат до банките и штедилниците, доколку оценат дека има потреба од тоа. Притоа, предвидено е тие да можат се обратат електронски или писмено, а одговорот ќе го добиваат преку електронска комуникација.