Одлуката за донација беше донесена од Советот на Град Скопје на вчерашната седница за, како што велат оттаму, израз на солидарноста на скопјани за граѓаните зафатени од воениот конфликт во таа земја
Седум милиони денари хуманитарна помош ќе добијат граѓаните на Украина како донација од Град Скопје.
Одлуката за донација беше донесена од Советот на Град Скопје на вчерашната седница за, како што велат оттаму, израз на солидарноста на скопјани за граѓаните зафатени од воениот конфликт во таа земја.
„Советот на Град Скопје вчера, 10.03.2022 година, ја одржа шестата седница на која се изгласа Одлука за давање хуманитарна помош за граѓаните на Украина во износ од седум милиони денари, како израз на солидарноста на скопјани за граѓаните зафатени од воениот конфликт во таа земја“,
велат оттаму.
По почетокот на конфликтот во Украина на 24 февруари, Владата на Република Северна Македонија се придружи на сеопфатната поддршка на сојузниците во НАТО и партнерите во ЕУ и донесе одлука за донација на воени средства и опрема за официјалните вооружени сили на Украина, согласно побарувањата на украинските власти.
Одлука за испраќање на наши војници во Украина нема да има, а тоа неколкупати досега го потенцираа министерката за одбрана Славјанка Петровска и Министерството за надворешни работи.
Вчера до јавноста порака упати Министерството за надворешни работи (МНР) во врска со испраќање на наши војници во Украина, во која беше наведено оти учеството во која било странска војска е кривично дело.
„Како земја пријател на Украина, имаме разбирање за сложената состојба во која се наоѓа Украина и која ги става во посебна состојба украинските власти да повикуваат за секаков вид помош, во сите пријателски земји, вклучувајќи и придружба и/или доброволци кои би се приклучиле на украинската армија во одбраната од воената закана која доаѓа од руските воени сили. Сепак, Министерството за надворешни работи ги потсетува граѓаните на Северна Македонија дека учеството во која било странска војска, со законските прописи, поточно со Кривичниот законик на земјава, е кривично дело“,
порачува МНР.
Во меѓувреме, хуманитарна помош за Украина се собира на повеќе места низ С Македонија. Здружението на Украинци „Лесја Украинка“ отвори голем пункт во скопската населба Ѓорче Петров, а за таа намена има и поставен шатор на градскиот плоштад во Скопје. Велат дека е потребно буквално сѐ – од лекови и храна до облека и обувки.