Еуросупер БС 95 ќе се продава по 81,5 денар по литар, еуросупер БС 98 за цена од 83,5 денари, додека дизелот од полноќ ќе се продава по 79,5 денари за литар
Бензините од вечерва на полноќ ќе се продаваат по цени пониски за пет денари по литар, додека дизелот поевтинува за шест денари по литар, соопшти попладнево Регулаторната комисија за енергетика (РКЕ).
„Регулаторната комисија за енергетика и водни услуги на Република Северна Македонија донесе одлука со која се врши намалување на малопродажните цени на нафтените деривати во просек за 5,95 проценти во однос на одлуката од 15.03.2022 година“,
пишува во соопштението од РКЕ.
Согласно одлуката, малопродажната цена на Екстра лесното масло за домаќинство (ЕЛ-1) се намалува за 5,50 денари по литар, малопродажната цена на мазутот М-1 НС се намалува за 2,550 денари по килограм.
Според одлуката од 17.3.2022 година од 00:01 часот максималните цени на нафтените деривати ќе изнесуваат:
- Моторен бензин ЕУРОСУПЕР БС 95 – 81,50 (денари/литар)
- Моторен бензин ЕУРОСУПЕР БС 98 – 83,50 (денари/литар)
- Дизел гориво ЕУРОДИЗЕЛ БС (Д-Е V) – 79,00 (денари/литар)
- Масло за горење Екстралесно 1 (ЕЛ-1) – 75,50 (денари/литар)
- Мазут М-1 НС – 56,749 (денари/килограм)
Од РКЕ воедно потсетуваат дека трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.
Регулаторка во соопштението посочува дека референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 4,533 отсто, кај дизелот за 7,922 проценти, кај екстралесното масло за 7,911 отсто и кај мазутот намалувањето е во просек за околу 4,928 проценти.