По објавувањето на конечноста на резултатите, со што се констатира дека кандидатката Гордана Силјановска-Давкова е новата претседателка на земјава, од страна на Државната изборна комисија утринава на професорката и официјално ѝ беше врачено уверението за претседател
Првиот човек на ДИК, Александар Даштевски, од име на Комисијата ѝ посака успешен мандат на Силјановска-Давкова откако претходно на седницата на ДИК беше усвоен заклучокот за конечност на резултатите од гласањето на претседателските избори во земјава.
На прес-конференција, утринава, Државната изборна комисија ги објави конечните резултати од гласањето на изборите за претседател на 8 мај. ДИК констатираше дека за претседател е избрана професорката Гордана Силјановска-Давкова со мнозинство од гласовите, односно 561 000, додека нејзиниот опонент, професорот Стево Пендаровски освои 251 899 гласови. Записникот за конечност на резултатите од гласањето беше едногласно усвоен на седницата.
Сега следува процесот на инаугурација на новата претседателка во Собранието, која според најавите е извесно дека ќе се одржи утре напладне. Гордана Силјановска-Давкова, која е шестиот претседател на Македонија од независноста и воедно прва жена претседател, пред пратениците од претходниот парламентарен состав треба да даде свечена изјава по која и официјално ќе започне нејзиниот петгодишен мандат.