Од насилството, како што информираат од Обвинителството, детето претрпело силен страв и стрес, кои довеле до губење на говорот и страв од одење во градинка
Триесет и двегодишна негувателка во детска градинка во скопско Радишани е осомничен дека психички и физички малтретирала тригодишно дете кое ја посетувало јаслената група во градинката.
Основното јавно обвинителство Скопје, како што соопштија денеска оттаму, донело наредба за спроведување истражна постапка против негувателката за која постојат сомневања дека сторила продолжено кривично дело запуштање и малтретирање дете според член 201 став 1 во врска со член 45 од Кривичниот законик.
Во краткиот опис на делото за кое се сомничи негувателката се наведува дека таа во периодот од 2022 до 2023 година во повеќе наврати извршила психичко и физичко насилство кон детето, на кое му се обраќала со погрдни зборови и тегнела за коса.
Од насилството, како што информираат од Обвинителството, детето претрпело силен страв и стрес, кои довеле до губење на говорот и страв од одење од во градинка.
Надлежниот јавен обвинител до судија на претходна постапка од Основниот кривичен суд Скопје доставил предлог на осомничената да ѝ бидат одредени повеќе мерки на претпазливост, кои вклучуваат забрана за напуштање на живеалиштето и обврска да се јавува повремено на определено службено лице или кај надлежен државен орган.
Обвинителството, исто така, бара од судот на осомничената да ѝ биде одземен пасошот и да ѝ се забрани да ја посетува градинката и сите објекти кои се дел од неа, односно да оди на работа, како и да се доближува и да одржува контакти со оштетеното дете, неговите родители и со сведоците.