Според Институтот за економија и мир, поголем дел од земјите од Западен Балкан бележат напредок во состојбата за мир, безбедност и внатрешна стабилност
ИЕП рангира 163 независни земји и територии во светот, оценувајќи ја состојбата на мир во тие земји во публикацијата „Индекс на мирот“ (Peace index) за 2021 година
Северна Македонија е најбезбедна земја на Западен Балкан, според истражувањето на Институтот за економија и мир (ИЕП).
Индексот на Северна Македонија е зголемен за 11 индексни поени, и државава е на 40-то место во светот, додека на прво место во светот е Исланд, а на последното – 163-то се наоѓа Авганистан.
Напредокот на Северна Македонија
Северна Македонија имаше петтиот најголем напредок во однос на глобалниот индекс на мирот за 2021 година, со 5,2 проценти подобрување во својот резултат. Земјата се искачи за 11 места на ранг -листата на ГПИ и сега е на 40 -то место.
Според анализата, ваквиот напредок во голема мера е поттикнат од подобрувања во делот „тековен конфликт“. Најголем напредок има кај индексот за внатрешен конфликт, кој сега е на најниско ниво од 2016 година.
„Конфликтот со Грција исчезна со потпишувањето на Договорот од Преспа, иако Бугарија продолжува да ги блокира преговорите за членство на Северна Македонија со ЕУ. И покрај некои поделби во земјата околу Договорот од Преспа, прашањето не е толку поларизирачко како што беше пред една година“,
се вели во извештајот.
На доменот безбедност и сигурност, има подобрувања во делот на политички терор, стапката на убиства, стапката на затворање и влијанието на тероризмот. Но, покрај овие подобрувања, во ивештајот се наведува дека Северна Македонија забележа влошување на перцепцијата за криминалот.
Во извептаајот се наведува дека ова е четврта последователна година како Северна Македонија забележува подобрувања на полето на безбедноста и сигурноста, при што се наведува дека делот на милитаризацијата е подобрен делумно благодарение на подобрување на посветеноста на Македонија кон мировните мисии на ОН. Но, сепак, ИЕП забележува влошување на параетрите во делот на воените трошоци.
Зад Северна Македонија се Србија (44. место), Албанија (48. место), Црна Гора (51. место), Босна и Херцеговина (72. место) и на 80. место од земјите од Западен Балкан се наоѓа Косово.
Според Институтот, поголем дел од земјите од Западен Балкан бележат напредок во состојбата за мир, безбедност и внатрешна стабилност.
ИЕП рангира 163 независни земји и територии во светот, оценувајќи ја состојбата на мир во тие земји во публикацијата „Индекс на мирот“ (Peace index) за 2021 година.