„Мислам дека ставот на ЕК е многу јасен. Нејзиниот став не е сменет. Се разбира, од наша страна ние можеме да кажеме само дека одблиску ги следиме сите случувања што се поврзани со судството, се разбира и сите измени или последици што произлегуваат од измените на Кривичниот законик. Ќе излеземе со нови оцени, со нови коментари во врска со понатамошни можни идни развои на ситуацијата“, изјави денеска шефот на Делегацијата на ЕУ во С Македонија
На изјавата на премиерот Ковачевски дека одговорите за застарувањето на предметот за масовното прислушување „Таргет-Тврдина“ треба да се бараат во бавниот тек на водењето на постапката, а не во измените на Кривичниот законик, попладнево реагираа од опозициската ВМРО-ДПМНЕ од каде што велат дека тој и Владата се одговорни за директен упад во правниот систем и правната држава, поради што застаруваат актуелни судски предмети
Евроамбасадорот Дејвид Гир денеска не сакаше да го коментира застарувањето на делото злоупотреба на службената положба и овластување во предметот „Таргет-Тврдина“ со кој од натамошно гонење во случајот се спаси ексдиректорот на УБК, Сашо Мијалков, но рече дека ставот на Европската комисија во однос на измените на Кривичниот законик не е сменет.
Тој потсети дека ЕК претходно изрази длабока загриженост во врска со импликациите што ги има принципот на неказнивост поради измените на Кривичниот законик, како и употребата на европското знаменце при неговото носење.
„Мислам дека ставот на ЕК е многу јасен. Нејзиниот став не е сменет. Се разбира, од наша страна ние можеме да кажеме само дека одблиску ги следиме сите случувања што се поврзани со судството, се разбира и сите измени или последици што произлегуваат од измените на Кривичниот законик. Ќе излеземе со нови оценки, со нови коментари во врска со понатамошни можни идни развои на ситуацијата“,
изјави Гир, кој денеска заедно со премиерот Димитар Ковачевски и вицепремиерот за европски прашања Бојран Маричиќ беше во посета на компанијата „Вивакс“.
Одговорите за застарувањето на предметот за масовното прислушување „Таргет-Тврдина“, според премиерот Димитар Ковачевски, пак, треба да се бараат во бавниот тек на водењето на постапката, а не во измените на Кривичниот законик што беа предложени од Владата.
„Јас никогаш досега не сум коментирал судски постапки. Тоа што е карактеристично е што станува збор за случај, од она што е достапно јавно, којшто е започнат уште во 2015 година, кој е во второстепена постапка веќе три години, меѓутоа во текот на тие осум години не бил завршен како случај. Така што, сите одговори за ефикасноста во однос на решавањето на случајот и во однос на текот јас не би можел да ги дадам, тоа можат да го дадат единствено оние коишто работеле на истиот. Така, тоа е одговорот што можам да го дадам“,
изјави Ковачевски.
На дополнително прашање дека предметот застарува токму поради измените на Кривичниот законик кои ги предложи Владата со која раководи и дека барањето за коментар е токму во овој контекст, премиерот рече дека измените на КЗ биле поради усогласување со европското законодавство, а не поради судски случаи за кои со години се водат постапки.
Ако било така, додаде Ковачевски, тогаш во земјава би требало да се воведе незастарување и сите судски случаи да можат да траат со децении.
„Предлог-законот и целото решение на измените коишто беа на Кривичниот законик и коишто се однесуваа на усогласување со европски директиви во делот на конфискација на имот и во други делови вклучително и на одредени членови коишто се усогласуваат со законодавства на земји членки на Европската Унија, на точно 19 од нив…, а не заради судски случаи коишто се наоѓаат во постапка осум, девет, десет години итн., бидејќи по таа теза тоа би значело дека кај нас би требало да се воведе незастарување на ништо и да сите судски случаи можат да траат по 50, 60 години кога би биле решавани. Меѓутоа, сепак праксата на земјите членки на Европската Унија укажува на рокови, коишто рокови обезбедуваат судење согласно со пракса којашто нуди ефикасност за сите странки во процесот“,
изјави премиерот.
На изјавата на премиерот попладнево преку писмено соопштение реагираа од опозициската ВМРО-ДПМНЕ, од каде што велат дека Ковачевски и Владата со измените на Кривичниот законик се директно одговорни што актуелни судски процеси застаруваат.
„Настапите на Ковачевски се само форма без содржина. Сè му е во стилот ‘јас не сум од овде’ или ‘купи ден помини’. Ковачевски треба да знае дека владата на ДУИ и СДС со измените на Кривичниот законик направи директен упад во правниот систем и правната држава и тој е лично одговорен за тоа што сегашни судски процеси застаруваат. Правдањето со некакво усогласување со европско законодавство беше демантирано од страна на европските претставници и истото ќе го чуеше Ковачевски неколку минути после тоа ако не побегнеше од прес-конференцијата која сам ја најави“,
велат од ВМРО-ДПМНЕ алудирајќи на изјавата на евроамбасадорот Гир во однос на непроменетиот став на Европската комисија во врска со измените на КЗ.
Од опозициската партија го прозваа Ковачевски дека е лично одговорен што се воспоставува култура на неказнивост.
„Доколку, пак, мисли дека со измените на Кривичниот законик ќе се спасат актуелните функционери од кривично гонење за сторениот криминал, многу се лаже. А, уште повеќе се лаже ако мисли дека ќе се вади на тоа дека во Влада никој не го есапи и одлуки се носеле во негово отсуство. Одговорност ќе има и таа одговорност ќе ја почувствува кога ќе се охрабри да се соочи со народот“,
се додава во писмената реакција од ВМРО-ДПМНЕ.
За потсетување, Основниот кривичен суд Скопје вчера донесе решение за запирање на кривичната постапка за случајот за „Таргет-Тврдина” за обвинетите Горан Грујевски, Сашо Мијалков, Надица Николиќ, Владимир Варелов, Маријан Шумуликоски и Васил Исаковски за делата злосторничко здружување и злоупотреба на службена положба и овластување поради настапено застарување.
Со ова застаруваат кривичните дела за нелегалното прислушување за предметот, а во судница остануваат обвинетите што се опфатени со делот за уништување на опремата.
Судијата Илија Трпков на рочиштето рече дека кривичниот совет го имал предвид предлогот на јавниот обвинител изнесен пред почетокот на денешната главна расправа за предметот.
Обвинителката Ленче Ристоска, која го застапува обвинението, по денешното рочиште изјави: „За жал, нема да имаме кривичноправна разрешница и во овој случај и повторно нема да има одговорност за незаконското прислушување во државата“.
Целосната застареност на случајот, рече Ристоска, е директна последица на измените во Кривичниот законик.
Прашана за тоа кој ќе ги плаќа штетите за прислушувањето со ваква правна завршница на предметот, обвинителката Ристоска вели дека трошоците за кривичната постапка паѓаат на товар на Буџетот. На товар на државата, додаде таа, паѓаат и трошоците за обесштетување на лицата кои биле оштетени од прислушувањето.