Поради посетата на германскиот претседател, приватните автобуски превозници синоќа одлучија привремено да ја прекинат блокадата кај крстосницата пред „Мавровка“
Претседателот на Германија, Франк-Валтер Штајнмајер, од денеска па до 1 декември ќе престојува во официјална посета на Македонија. Тој првпат ја посетува нашата земја.
Фокусот на посетата е ситуацијата во регионот, влијанието на војната во Украина и тековната поддршка на Германија за перспективите на земјата за пристапување во ЕУ.
Според агендата, планирани се политички разговори на 29 и 30 ноември со претседателот Стево Пендаровски и премиерот Димитар Ковачевски, а предвидено е Штајнмајер да се обрати и во Собранието.
Поради посетата на германскиот претседател, приватните автобуски превозници синоќа одлучија привремено да ја прекинат блокадата кај крстосницата пред „Мавровка“.
„Со оглед на информацијата од МВР дека утре доаѓа висока делегација од Германија на чело со претседателот, ги замолив превозниците да покажат со гест дека не сакаат да го нарушат угледот на државата и да ги отежнат безбедносните протоколи – да се повлечат од блокадите во период на присуство на делегацијата односно до четврток, а доколку дотогаш не се постигне некаков договор со Градот Скопје и ЈСП, на улица ќе излезат повторно во петок“,
изјави синоќа Ленин Јовановски од „Слобода превоз“.
Тој најави оти тогаш ќе се блокира со сите 200 автобуси и Скопје ќе биде блокирано на повеќе сообраќајници сè до конечно решавање на проблемот.