„Видот на третман од центарот во Австрија наведен во профактурата што му е понудена на семејството се однесува на здравствени услуги од областа на физикална терапија и медицинска рехабилитација. Првостепената комисија на чело со претседателката д-р Сања Петрова, го одбила барањето затоа што сметала дека таков третман може да му се обезбеди и во нашата држава, иако не е посочена конкретна клиника или здравствена институција“, велат надлежните од ФЗО
Тоа што во конзилијарното мислење не е наведена потребната интервенција или посочена здравствена установа каде треба да се хоспитализира Леонид Индов, според надлежните во Фондот за здравствено осигурување (ФЗО) остава широк простор за шпекулации. Директорите на ФЗО денеска на брифинг со новинарите објаснија како постапуваат при барања на пациенти за лекување во странство и како е постапено во случајот со младиот Леонид, за кој Првостепената комисија донела негативната одлука врз основа на конзилијарно мислење од Клиниката ТОАРИЛУЦ и врз основа на профактурата со понудени услуги од болницата во Австрија што треба да овозможат тој да се ослободи од респиратор и да му се врати самостојното дишење.
„Спорно е дали се работи за ’медицинска рехабилитација’ или за ’лекување’ затоа што конзилијарното мислење од ТОАРИЛУЦ, каде што Индов бил хоспитализиран еден месец, од септември до октомври 2023 година не содржи конкретна насока за вид на интервенција што е потребно да се изведе при лекувањето во странство, туку само општи процедури за рехабилитација и тоа што се очекува од нив“,
рекоа надлежните од ФЗО.
Раководството на Фондот, како што велат, се обратило со допис до Клиниката за да појасни каква интервенција му е потребна на момчето, но оттаму повторно не добиле прецизен одговор.
„Видот на третман од центарот во Австрија наведен во профактурата што му е понудена на семејството се однесува на здравствени услуги од областа на физикална терапија и медицинска рехабилитација. Првостепената комисија на чело со претседателката д-р Сања Петрова, го одбила барањето затоа што сметала дека таков третман може да му се обезбеди и во нашата држава, иако не е посочена конкретна клиника или здравствена институција“,
соопштиле директорите од Фондот на брифингот со новинарите.
На прашањето дали и каде има соодветна установа во нашата земја за да му го овозможи третманот на Леонид, директорите од Фондот одговориле дека тоа треба да го образложат докторите кои ја ценеле неговата состојба.
Надлежните од Фондот посочиле дека се потребни измени на Законот за здравствено осигурување, како и дека тие се согласни да иницираат законски измени, но истовремено сметаат и дека е потребно да се направи нов начин на финансирање на здравствениот систем, затоа што Фондот располага со мал буџет за да излезе во пресрет на потребите на граѓаните во чекор со развојот на медицината.
„Во деценија кога има бум во иновациите во лекувањето и во фармацијата, веќе 15 години придонесот за здравствено осигурување е 7,4 отсто и е најнизок од околните земји. Минатата 2023 година ФЗРСМ исплатил 324 милиони денари за 307 лекувања во странство“,
велат од ФЗО.
Инаку, по приемот на решението од Првостепената комисија, семејството на Леонид има право на жалба во рок од 15 дена до Второстепена комисија.
Заменик-министерката за здравство Маја Манолева денеска на прашањето дали по случајот на младиот Леонид ќе предложат да се направат законски измени со цел да се овозможи лекување и рехабилитација на пациентите на трошок на државата, рече дека прво треба да се испочитува здравствениот систем, пациентите да ги исцрпат сите можности кои тука ги имаме, и дури потоа да се упатат на лекување или на рехабилитација во странство.
„Треба прво да се изоди тој пат, па потоа да ја прегледаме целата медицинска документација, да го видиме клинички пациентот и потоа стручниот колегиум да даде свое мислење дали има или нема можност за продолжување на лекувањето и рехабилитацијата во нашите институции“,
рече заменик-министерката за здравство.
Индов на почетокот на месецов (6 февруари) беше транспортиран на лекување во Виена, Австрија, а властите тогаш се пофалија дека тој е првиот пациент од земјава кој се транспортира со медикоптерот на Министерството за внатрешни работи.
Во меѓувреме на социјалните мрежи се споделува повик до граѓаните да донираат средства за младиот Индов да може да го продолжи лекувањето во Виена.
За потсетување, Леонид Индов минатото лето доживеа тешка несреќа на летување во Грција, при што повреди повеќе ’рбетни пршлени. Дише на респиратор и не може да ги движи екстремитетите. Поради тоа и транспортот со хеликоптер беше ризичен и сложен, зашто морал да патува приклучен на респиратор и под специјалистичка лекарска придружба.
