Врз основа на препораките од Австрија и ГОБ ‘8 Септември’, ќе се одобри употреба на лекови неопходни за ваков тип третман, велат од ФЗО
Лекувањето на младиот Леонид Индов во Градската општа болница „8 Септември“ ќе го покрие Фондот за здравствено осигурување, информираат оттаму. Како што соопштија од ФЗО, минатата недела Владата побарала да се смени претходната одлука на Фондот со која беше одбиено барањето за покривање на трошоците за лекување на Леонид, со тврдење дека има услови за лекување во земјата, без да се наведе каде е тоа.
„ФЗО врз основа на препораките од Австрија и ГОБ ‘8 Септември’, ќе се одобри употреба на лекови неопходни за ваков тип третман. ФЗО е сервис на граѓаните, на сите оние што имаат потреба од здравствени услуги. Работиме на воспоставување јасни правила за да се намали можноста од неправилности и злоупотреби. За тоа ги анализираме констатираните проблеми во извештаите на Државниот завод за ревизија, како и поплаките на граѓаните“,
се наведува во соопштението од ФЗО.
Министерот за здравство Арбен Таравари претходно изјави дека внимателно ќе се следи третманот на младиот Индов кој вчера доцна попладне со медикоптер е вратен во Скопје по неговото лекување во Виена. Транспортот бил со хеликоптерот на МВР, во кој има специфична медицинска опрема, а во леталото бил присутен и медицински персонал.
„360 степени“ денеска се обиде да стапи во контакт со таткото на Леонид за да ни каже каква е состојбата со момчето по неговото лекување во Виена. Но, поради преголема ангажираност околу Леонид, таткото не можеше да одговори.
Индов на 6 февруари беше транспортиран на лекување во Виена, Австрија, а властите тогаш се пофалија дека тој е првиот пациент од земјава кој се транспортира со медикоптерот на Министерството за внатрешни работи.
Две недели подоцна стигна веста дека Фондот за здравствено осигурување го одбил барањето на семејството на Индов – момчето да се лекува во Виена, затоа што такво „продолжено болничко лекување“ можело да се изврши и во здравствени институции во земјава.
Во меѓувреме на социјалните мрежи се споделуваше повик до граѓаните да донираат средства за младиот Индов да може да го продолжи лекувањето во Виена.
Во денешното соопштение од ФЗО се повикуваат граѓаните во иднина прво да се обратат до нив, пред да почнат да собираат донации за одредено лекување во странство.
„Поради постоечка недоверба во институциите, многумина на кои им е потребно лекување во странство се одлучуваат за собирање донации, без воопшто да се обратат до здравствените установи и Фондот за здравствено осигурување“,
стои во соопштението од ФЗО.