Грција и официјално ја доби помошта од Европската агенција и крајбрежна стража „Фронтекс“ за брза интервенција на границата на нејзината морска граница во Егејското море.
Преку соопштение, „Фронтекс“ појаснува дека брза надворешна интервенција претставува обезбедување итна помош на земја-членка на ЕУ, која е подложена на екстремен притисок на надворешните граници, особено поврзано со голем број на државјани што не се членки на ЕУ, кои се обидуваат илегално да влезат на нивната територија.
„Со оглед на брзиот развој на ситуацијата на надворешните граници со Турција, моја одлука е да се преземe брза гранична интервенција, што беше побарано од Грција. Ова е дел од мандатот на „Фронтекс“, давање помош на земја-членка во итна ситуација“,
рече извршниот директор на „Фронтекс“, Фабрис Леџери.
Во соопштението се посочува дека веќе го зајакнале капацитетот на грчката граница, а откако ќе се усогласи акциониот план со Грција, „Фронтекс“ ќе побара од земјите-членки на ЕУ и Шенген зоната во рок од пет дена да обезбедат граничари и друг потребен персонал од заедничкиот фонд за одговор при итни случаи.
Како што јавува дописничката на МИА од Атина повикувајќи се на грчки владини извори, за 60 часа во Грција нелегално се обиделе да влезат над 24 илјади лица, односно од саботата во шест часот наутро до попладнево во 18 часот спречени биле 24 203 обиди за нелегален влез во земјата.
Упасени биле 183 лица, а за дел од нив била донесена и пресуда за нелегален влез во земјата, со обвинение на четири години затвор и парична казна од 10 илјади евра за секој од нив. Уапсените кои сѐ уште не се изведени пред суд се префрлени во центри за притвор на мигранти.
Во однос на денешниот ден, според истите извори, за 12 часа, односно од шест часот утрово до 18 часот попладнево, биле спречен нелегален влез во Грција за 4354 лица, а биле уапсени 42 мигранти, во главно од Авганистан, Пакистан и Мароко.
Националниот совет за безбедност на Грција вчера донесе одлука да го подигне нивото на обезбедување на државните граници и од тој момент во следниот еден месец нема да се примаат нови барања за азил, објави на Твитер грчкиот премиер Киријакос Мицотакис по состанокот.Мицотакис притоа се повика на членот 78 став 3 од Договорот за функционирање на ЕУ (ТФЕУ).
„Границите на Грција се надворешни граници на ЕУ и ќе ги заштитиме“,
напиша Мицотакис.
Тој најави дека во вторник грчко-турската граница ќе ја посети заедно со претседателот на Европскиот совет Шарл Мишел.
ТФЕУ е еден од двата основни договори на ЕУ, заедно со Договорот за Европска унија(ТЕУ). Во него се дефинираат принципите и целите на ЕУ и обемот на дејствување во нејзини рамки и се утврдени организациски и функционални детали за институциите на ЕУ.
Турција пред неколку дена реши повеќе да не ги запира сириските бегалци кои по копнен пат и по море заминуваат кон Европа, изјавил за Ројтерс турски владин претставник. Според истиот извор, турската полиција, крајбрежната стража и граничната безбедност добиле наредба да отстапат пред налетот на мигрантите.