Доставувачи на пица, комуналци, полиција и по некој возач вечерва на скопските улици. Министерот за внатрешни работи Наќе Чулев соопшти дека немало посериозни прекршувања на полицискиот час
Во пресрет на големиот христијански празник Велигден, скопските улици вечерва беа речиси комплетно празни. На сила е најдолгиот полициски час. Забраната за движење започна во петокот во 16 часот, а ќе трае до вторник во 5 наутро, вкупно 85 часа.
Екипата на „360 степени“ на улиците во центарот на градот вечерва забележа само полициски патроли, по некој возач со дозвола за движење за време на полициски час, како и доставувачи на пица.
Единствени пешаци кои ги забележавме беа вработените во комуналното претпријатие, кои по критиките, се вратија на работење во три смени.
Минатиот викенд граѓаните жестоко реагираа зошто комуналниот отпад не се собира и работниците работат само во една смена. Градоначалникот Петре Шилегов кажа дека најверојатно се работи за погрешна проценка на „Комунална хигиена“, сметајќи на тоа дека во полициски час граѓаните нема да фрлаат ѓубре и вети дека таква слика нема да се повтори за Велигден.
Празно беше вечерва во и околу Соборниот храм во Скопје.
Велигденската богослужба г.г. Стефан ја одржа без верници.
Архиепископот беше придружуван од црковни лица, а настанот во храмот го следеа само новинарските екипи. Мал број на верници Велигден го дочекаа со свеќи во рацете на терасите од околните згради. Храмот го обезбедуваше полиција.
Министерот за внатрешни работи Наќе Чулев на “Фејсбук” објави дека ноќва немало посериозни прекршувања на полицискиот час.
„Полициските службеници ме информираа дека изминататата вечер на улиците на главниот град било мирно и без посериозно прекршувања на Законот, а граѓаните на Скопје ги почитуваат мерките за ограничување на движењето. Им благодарам на сите за свеста и совеста што ја покажуваат во вакви важни моменти. На овој голем празник посакувам емпатијата, меѓусебната поддршка, почитувањето и разбирањето да бидат наши водилки во периодот што следи. Честит Велигден на сите граѓани од православна вероисповед!“,
објави Чулев.