Полноќната велигденска богослужба во Соборниот храм во Скопје за првпат се одржа без верници. Архиепископот г.г. Стефан и свештениците сами го направија опходот околу храмот, а пред да го објават Христовото воскресение се помолија и за болните од коронавирус, како и за оние кои се во првите борбени редови против заразата.
„На Бога секогаш и секаде може да му се молиме. Го благословуваме сиот наш верен народ, и болните, и вработените во болниците, и војската, и полицијата и сите кои се борат со заразата. Христос воскресе! Вечен да ни е Велигден“,
кажа г.г. Стефан.
Верскиот чин го следеа само новинарските екипи и мал број верници кои со свеќи во рацете излегоа на терасите од околните згради. Храмот го обезбедуваше полиција.
Иако Владата не ги затвори црквите, поради полицискиот час храмовите и вечерва се празни. МПЦ претходно им порача на верниците да го дочекаат Велигден во своите домови.
Техничкиот премиер Оливер Спасовски денеска ги повика верските заедници во Македонија да ја преземат одговорноста за заштита на здравјето и животот на граѓаните.
*поврзана вест: (ФОТОГАЛЕРИЈА) Скопје празно и за велигденската ноќ