Станува збор за вкупен број на загинати во регионите и провинциите на двете земји, кој од минута во минута постојано расте како што спасувачките екипи го пребаруваат теренот во потрага по преживеани лица и нивно итно хоспитализирање
Црниот биланс од резорниот земјотрес со јачина од 7,8 степени според Рихетеровата скала што рано утрово ги погоди јужните делови на Турција и северна Сирија се искачи на најмалку 641 лице, пренесува Гардијан.
Станува збор за вкупен број на загинати во регионите и провинциите на двете земји кој од минута во минута постојано расте, како што спасувачките екипи го пребаруваат теренот во потрага по преживеани лица и нивно итно хоспитализирање.
Како што јавуваат агенциите, се верува дека стотици луѓе сè уште се заробени под урнатините додека спасувачките работници ги пребаруваат насипите од остатоци во градовите и населбите низ областите погодени од силниот земјотрес.
Асошиејтед прес објави дека според турската агенција за управување со катастрофи и вонредни состојби најмалку 245 луѓе загинале во седум турски провинции, додека потпретседателот Турција, Фуат Октај на прес-конференција информираше за најмалку 284 загинати, пренесува агенцијата Анадолија.
Според податоците на турскиот потпретседател што ги пренесува новинската агенција Анадолија, досегашниот биланс на повредени е најмалку 2 323 луѓе.
Според сириските државни медиуми, бројот на загинати во областите под контрола на владата во Дамаск се искачи на најмалку 237 лица, а повеќе од 639 се повредени. Информациите соопштени од страна на Белите шлемови – волонтерска организација што делува во сириските области под контрола на опозициските бунтовници – велат дека таму бројот на загинати изнесува најмалку 147 луѓе.
Урнати згради, како што пренесува Гардијан има на потегот од сириските градови Алепо и Хама до турскиот град Дијарбекир, што е растојание повеќе од 330 километри.
Како што изјави Октај, речиси 1 710 згради се уништени во турските провинции Газиантеп и Кахраманмарас, додека во урнатини се наоѓа и болницата во медитеранскиот крајбрежен град Искандерун, но бројот на жртви таму останува непознат.
„За жал, во исто време, ние се бориме и со екстремно тешки временски услови“,
рече Октај за новинарите.
Според турската Управа за справување со кризи и вонредни состојби (АФАД) земјотресот бил со јачина од 7,4 степени според Рихтеровата скала, се случил во 4:17 минути по локално време, а епицентарот бил во областа Пазарџик во јужната турска провинција Кахараманмарас.
Земјотресот бил со длабочина од 7 километри.
Покрај Пазарџик, земјотресот најмогу ги погоди и провинциите Газиантеп, Санлиурфа, Дијарбакир, Адана, Адијаман, Малатија, Османије, Хатај и Килис.
Земјотресот бил почувствувал и во соседните Либан и Сирија.
Засега нема информации дали во катастрофалниот земјотрес што утрово ја погоди југоисточна Турција има повредени наши граѓани, но од МНР велат дека веднаш стапиле во контакт со амбасадата на Северна Македонија во Анкара и Генералниот конзулат во Истанбул кои се во постојана комуникација со турските надлежни институции.
Дипломатско-конзуларните претставништва на земјава, велат од МНР, се на 24-часовно располагање за наши државјани за сите евентуални прашања.
Од МНР објавија и телефонски броеви за контат од амбасадата во Анкара, конзулатот во Истанбул и СОС телефонот во Скопје:
- Анкара: +905394569710;
- Истанбул +905456149777;
- СОС телефон на МНР во Скопје: +38975273732.