Со положувањето цвеќе на почивалиштето на првиот претседател на Крушевската Република, Никола Карев, започнува централната прослава во Крушево за Денот на Републиката – Илинден, кој оваа година се одбележува под слоганот „Нашата сила за иднината“
Владината делегација предводена од премиерот Димитар Ковачевски утринава оддаде почит и положи свежо цвеќе на вечното почивалиште на Никола Карев, првиот претседател на Крушевската Република, во „Македониумот“ на Гумење – Крушево.
Со ова, започнува централната прослава во Крушево за Денот на Републиката – Илинден, кој оваа година се одбележува под слоганот „Нашата сила за иднината“.
„Карев бил вистински визионер. Иднината на оваа земја ја гледал во добрите меѓуетнички и меѓурелигиски односи, а неговиот стремеж и стремежот на неговите востаници бил сите граѓани да земат рамноправно учество во градење на оваа земја, без разлика на вера или етничка припадност. Горд сум што ги исполнуваме нивните идеали, нашата држава чекори успешно во иднината. Создаваме модерна, мултиетничка и мултикултурна функционална демократија, општество во кое се почитуваат достоинството, етничките и културните специфики на сите граѓани“,
напиша премиерот Ковачевски на фејсбук.
Премиерот Ковачевски во Крушево ја предводи владината делегација во состав од вицепремиерката задолжена за политики за добро владеење, Славица Грковска, и министерот за внатрешни работи, Оливер Спасовски.
„Владината делегација предводена од премиерот Ковачевски ќе оддаде почит и ќе положи венци свежо цвеќе на историските спомен обележја посветени на Илинден во Крушево, на споменикот на Слива, кој претставува симбол на саможртвата на македонските востаници во одбраната на Крушевската Република, а ќе присуствуваат и на Панихида којашто традиционално се организира секоја година во чест на загинатите илинденци во црквата ‘Св. Никола’ во Крушево“,
информираат од владината прес-служба.
Потоа, ќе следи централната манифестација и обраќање на премиерот Ковачевски на Мечкин Камен.