fbpx
Свет

(ФОТО+ВИДЕО) Пукање во Луисвил, Кентаки: Полицијата потврди дека има повеќе жртви

360степени | 10 април, 2023 16:54

Според прелиминарните информации што ги пренесува Си-ен-ен, во инцидентот има најмалку петмина убиени и шест ранети кои се пренесени во болница. За време на инцидентот имало престрелка меѓу напаѓачот и полицијата. Според изворите на Си-ен-ен, напаѓачот бил застрелан и убиен од полицијата, но засега не е познато дали тој е меѓу шесте жртви за кои извести телевизијата

Полицијата во градот Луисвил во американската сојузна држава Кентаки потврди дека има повеќе жртви во пукање што се случило во градот, пренесува Би-би-си.

Во објава на Твитер од полициската управа на Луисвил соопштија дека во тек е акција против „активен агресор“.

Според првичните информации на дел од граѓаните, било побарано да се држат подалеку и да ја избегнуваат областа Ист Мејн додека трае полициската операција.

Видеоснимки од областа покажуваат тешко вооружени полициски екипи како опколуваат комерцијален објект во областа каде што се случило пукањето.

Инцидентот, како што пренесува британскиот национален сервис, се случил во централното градско подрачје на Луисвил, во близина на бејзбол-стадионот „Луисвил Слагер Филд“ и неколку блокови од Меѓународниот конгресен центар во Кентаки и центарот „Мухамед Али“.

Новинска снимка од местото на настанот покажува силно полициско присуство, како и оштетено стакло и медицинска опрема на една локација.

Многубројни полициски екипи се присутни на местото на вооружениот инцидент во центарот на Луисвил/Фото: Принтскрин

Според прелиминарните информации што ги пренесува Си-ен-ен, повикувајќи се на свои извори од местото на настанот, во инцидентот има најмалку петмина убиени и шест ранети кои се пренесени во болница.

За време на инцидентот имало престрелка меѓу напаѓачот и полицијата.

Според изворите на Си-ен-ен, напаѓачот бил застрелан и убиен од полицијата, но засега не е познато дали тој е меѓу шесте жртви за кои извести телевизијата.

Состојбата на настраданите не е позната, а според досега достапните информации сите се пренесени во универзитетската болница во градот.

Гувернерот на Кентаки, Енди Бешеар, соопшти дека се упатил на местото на настанот во центарот на Луисвил.

„ЛМПД потврди дека има пукање во центарот на Луисвил со повеќе жртви. Сега одам таму. Ве молам, молете се за сите погодени семејства и за градот Луисвил“,

напиша Бешеар на Твитер.

Во интервенцијата, полицијата на Луисвил била помогната и од специјални агенти на Федералното истражно биро (ФБИ), јавува Си-ен-ен.

©2024 360 степени, Сите права се задржани