Според првичните информации, се верува дека авионот на крајбрежната стража, кој пренесувал храна во областите погодени од силниот земјотрес што вчера ја погоди Јапонија, се судрил со патничкиот авион на „Џапан ерлајнс“, додека слетувал на пистата на аеродромот
Пет лица, кои се наоѓале во авионот на јапонската крајбрежна стража, загинале во инцидентот на токискиот аеродром „Хенада“, објави агенцијата АФП цитирајќи го јапонскиот министер за транспорт, пренесува Би-би-си.
Државната јапонска телевизија НХК, исто така, објавила дека во инцидентот има петмина мртви.
Во медиумските извештаи, кои ги пренесува британскиот национален сервис, се наведува дека капетанот на воздухопловот на крајбрежната стража побегнал од местото, но е тешко повреден.
Според првичните информации, се верува дека авионот на крајбрежната стража, кој пренесувал храна во областите погодени од силниот земјотрес што вчера ја погоди Јапонија, се судрил со патнички авион на „Џапан ерлајнс“, додека слетувал на пистата на аеродромот „Хенада“.
Јапонските медиуми пренесоа дека пламен излегува од прозорците на патничкиот авионот и од под него, а гори и пистата.
Во врска со инцидентот се огласија и од кабинетот на премиерот на Јапонија, Фумио Кишида, од каде што во објава на социјалната платформа Икс повикаа надлежните служби во најкраток можен рок да ја утврдат ситуацијата и предизвиканата штета.
Кратко по ова, Би-би-си пренесе дека јапонскиот премиер во разговор со група новинари во живо на телевизија потврдил дека пет од шестемина члена на екипажот на авионот на крајбрежната стража загинале додека се обидувале да однесат помош на луѓето погодени од вчерашниот земјотрес.
Тој им изрази сочувство на оние што загинаа додека се обидуваа да им служат на луѓето во неволја во областа Ното во префектурата Ишикав“.
Инаку, сите 379 патници и членови на екипажот на авионот на „Џапан ерлајнс“ се безбедно евакуирани пред воздухопловот да биде целосно зафатен од пламен.
Експерти за британскиот национален сервис ги пофалиле членовите на екипажот на патничкиот авион за брзата интервенција.
„Јапонија има беспрекорно досие кога станува збор за безбедноста на транспортот“,
изјавил професорот Греам Брејтвејт, директор за транспортни системи на Универзитетот „Кранфилд“ во Велика Британија.
Тој вели дека успешната евакуација покажува колку е вложено во обуката на екипажот.
„Нивниот фокус е на безбедноста. Тие се последните луѓе што го евакуираа авионот и изгледа дека направиле неверојатна работа“,
додал тој.
Некои медиуми, повикувајќи се наводно известување на токиската противпожарна служба, пренесоа дека евакуацијата на патниците била извршена за 90 секунди.
Tokyo Fire Department:
— gdh news (@gdhnews) January 2, 2024
Efforts to extinguish the fire on the plane are ongoing. The evacuation of the aircraft in Japan, which caught fire within minutes with 379 people on board, took only 90 seconds. pic.twitter.com/9uSqc9PxYP
Светските медиуми и понатаму пренесуваат фотографии и видеа од авионот на „Џапан ерлајнс“ во пламен.
Огромниот патнички авион изгорел до својата школка, а огромни облаци чад се издигаа кон ноќното небо во Токио.