Демонстрантите на денешниот, четврти по ред протест против францускиот предлог, ја скршија влезната врата на Министерството за надворешни работи, како и дел од прозорите на Собранието.
Протестот започна пред Владата, па преку МНР, заврши со тензии пред Собранието. Дел од присутните беа со фантомки, а кон институциите се фрлаше со најразлични предмети.
Тензиите настанаа кога група демонстранти ја пробија заштитната ограда пред Собранието и се впуштија кон кордонот полицајци, фрлајќи кон законодавниот дом со камења, шишиња и пиротехника.
На протестот, повредени се 47 полицајци, а уапсени се 11 демонстранти.
По извесно време, полицијата одлучи да интервенира и ја растера групата кон Градскиот трговски центар.
Протестот почна во 19 часот и беше масовен. Се бараа оставки, како и отфрлање на францускиот предлог, со цел, како што велат демонстрантите, да се зачува македонскиот јазик и идентитет.