Во несреќата учествувале вкупно 38 лица, од кои 26 се загинати. Сите патници биле на возраст од 17 до 69 години, а најмладиот загинат требало да наполни 18 години на 12 мај, соопшти украинската полиција
Тешка сообраќајна несреќа се случила вчера во северозападна Украина, во областа Ривне при судир на комбе, автобус и цистерна за превоз на гориво, при што загинале вкупно 26 лица, а 12 се повредени, соопшти украинската полиција во објава на Фејсбук.
„Утврдено e дека возачот на комбето кој ја предизвикал сообраќајката претекнал друго возило по што влетал на коловозната лента и се судрил со цистерната со гориво. Од ударот, цистерната влетала во коловозната лента, каде што се судрила со автобус и влегла во канал, каде што експлодирала“,
стои во соопштението од украинската полиција од областа Ривне.
Во несреќата, соопшти украинската полиција, учествувале вкупно 38 лица. Вкупниот број на загинати е 26. Од нив, 24 биле патници, а двајца од нив возачи – возачот на автобусот и возачот на комбето.
Повредени се 12 лица. Од нив 11 биле патници во автобусот, а другиот бил возачот на цистерната со гориво.
„Сите патници се на возраст од 17 до 69 години. Најмладиот загинат требало да наполни 18 години на 12 мај“,
се додава во соопштението од полицијата.
Кобната сообраќајка се случила вчера, 3 мај, во 19 часот и 20 минути на автопатот Киев-Чоп.