Повеќе матични лекари од земјава, денеска во 14 часот, прекинаа со работа и излегоа пред своите ординации, каде што со получасовен молк и пароли „Доста е“ секој поединечно протестираше поради, како што велат, игнорантскиот однос кон нив од самиот почеток на епидемијата со ковид-19.
Лекарите се фотографираа и фотографиите од протестот ги објавија на социјалните мрежи, под хаштаг #ДостаЕ#MjaftMë, откако претходно најавија дека нема да даваат изјави и да гостуваат по телевизии, а на политичарите им порачаа да ги поддржат од дома.
Тие имаат и конкретни барања до здравствените власти во земјава, како нивна вклученост во Комисијата за заразни болести, ангажирање на млад кадар во справувањето со епидемијата, но и помош во заштитна опрема… бидејќи, како што велат, сега молчеле под заштитните маски што сами си ги купуваат.
