Секоја година традиционално во Лешочкиот манастирски комплекс се празнува денешниот празник Успение на Пресвета Богородица – Голема Богородица.
Тамошниот собир се смета и за најмасовен во празнувањето на овој празник низ земјава, но годинава се разликуваше по две работи.
Првата е што многумина од христијанските верници не беа присутни поради состојбата со епидемијата предизвикана од ковид, а другата работа е што и малубројните посетители беа пречекани од расфрлано ѓубре низ целиот комплекс.
Празни шишиња од пиво и вино, пластични чаши, лименки, хартивчиња распослани на сите страни. Таква беше денешната слика во дворот на манастирот. Ѓубре имаше оставено и на гробот на Кирил Пејчиновиќ.
Тетовци велат дека ѓубрето најверојатно е оставено од претходната вечер, кога вообичаено се собираат помлади на ден пред празникот.
Во Лешочкиот манастир подготовките за празнувањето на Голема Богородица беа започнати уште пред два дена, кога и манастирската управа соопшти дека ќе ги спроведува сите протоколи и мерки препорачани од здравствените власти.
Одбележувањето на овој празник во Лешочкиот манастирски комплекс „Пресвета Богородица и свети Атанасиј Велики“ досега претставуваше најмасовен црковно-народен собир.
Празнувањето на Голема Богородица во Лешочкиот манастир претставува централната прослава за овој празник и воедно одбележувањето на манастирската слава.
