Јавната расправа за законот за јавно обвинителство предизвика големо внимание кај стручната и академнската јавност, во салата „Борис Трајковски“ немаше место за сите присутни. Покрај претставници од фелата, присутен е безмалку и половина од Правниот факултет во Скопје, главно професори по уставно и кривично право
Тројца пратеници од ВМРО-ДПМНЕ на самиот почеток на денешната јавна расправа за законот за јавно обвинителство во Собранието од галеријата на салата каде што се одржува седницата на Комисијата за политички систем извадија транспарент со порака до републичкиот обвинител Љубомир Јовески.
По обраќањето на министерката за правда Рената Дескоска, претседателот на собраниската Комисија за политички систем Александар Кирацоски му даде збор на Јовески.
Додека обвинителот се обраќаше од говорницата во салата „Борис Трајковски“ во Собранието, пратениците Антонијо Милошоски, Дафина Стојаноска и Горан Манојлоски од галеријата каде што се сместени новинарите развеаја транспарент.
„Господине Јовески, до кога ќе го криете писмото со кое притворената Катица ви даде незаконска наредба (член 60, Закон за ЈО)“, пишуваше на платното.
Кирацовски им се извини на гостите и сакаше да даде пауза, а обвинителот Јовески прокоментира дека не му пречи герила-акцијата.
За кратко, откако и Кирацовски побара собраниските служби да реагираат, транспарентот беше отстранет.
Расправата продолжи без пауза, веднаш откако тројцата опозициски пратеници ја напуштија салата.
Таа предизвика големо внимание кај стручната и академнската јавност, во салата „Борис Трајковски“ немаше место за сите присутни, па службите носеа столчиња од другите простории.
На дебатата присутни се и други обвинители, меѓу кои Гордана Смаќоска и Фатиме Фетаи, адвокати, но и безмалку половина од Правениот факултет во Скопје. Главно станува збор за професори по уставно и по кривично право, меѓу кои се: Гордана Силјановска, Гордан Калајџиев, Тања Каракамишева, Гордана Лажетиќ, Владо Камбивски, Светомир Шкариќ.