Притворот, како што претходно рекоа од Обвинителството, се бара поради опасност од бегство, како и опасност од уништување на трагите или влијание на потенцијални сведоци
Генералниот секретар на Владата, Мухамед Зеќири, попладнево се појави во Основниот кривичен суд во Скопје пред судија на претходна постапка кој ќе треба да одлучи дали ќе му одреди 30 дневен притвор или не. Тој во судот се појави сам во друштво на неговиот адвокат откако од Кривичен соопштија дека издале наредба до полицијата за негово спроведување.
Барањето за притвор го поднесе Обвинителството за гонење организиран криминал и корупција кое отвори истраги против Зеќири и двајца хрватски државјани.
Притворот, како што претходно рекоа од Обвинителството, се бара поради опасност од бегство, како и опасност од уништување на трагите или влијание на потенцијални сведоци.
Генералниот секретар е осомничен за злоупотреба на службена положба и овластување, во што му помогнале двајцата Хрвати.
Обвинителството го сомничи дека во периодот од април 2021 до јануари 2022 без да спроведе јавна набавка, склучил договори за консултантски услуги со фирма кој бил во вкупна вредност од околу 941 985 евра што е за околу 147 000 евра повеќе од 795 000 износ што бил договорен за консултантските услуги.
Шефицата на Обвинителството за гонење организиран криминал и корупција, Вилма Русковска, во изјава за „Слободен печат“ рече дека имаат податок каде се парите. Исто така, таа кажа и дека според информациите со кои располага обвинителство двајцата Хрвати, кои се сомничат дека му помогнале на Зеќири, не се во земјава и нашето обвинителство ќе ги испрати доказите до хрватските обвинители со цел, ако тие се согласат, да го процесираат случајот понатаму за нив.
Откако обвинителството објави дека е отворена истрага, Зеќири набргу се огласи и поднесе неотповиклива оставка од функцијата генерален секретар. Во објавата, како што наведе, тој е уверен дека ќе ја докаже неговата невиност.
„Верувам во институциите на системот, верувам во правичноста и праведноста и верувам дека вистината ќе излезе на виделина. На сите институции им стојам на располагање во секое време, за да ја докажам мојата невиност. Почитуван претседателе, Ви благодарам на укажаната можност да бидам дел од Вашиот владин состав и Ви благодарам што верувате во мојата заложба и посветеност во работата“,
напиша Зеќири во оставката што ја поднесе до премиерот Димитар Ковачевски.
Премиерот, пак, рече дека ја почитува одлуката бидејќи таа е акт на политичка одговорност и порача дека очекува целосно транспарентна и независна истрага од обвинителството и судските органи.