Џорџа Мелони, потенцијалната премиерка, ги минимизира постфашистичките корени на партијата и ја претставува како меинстрим политичка групација слична на британските конзервативци. Таа вети дека ќе продолжи да ја поддржува западната политика кон Украина и дека нема да експериментира со кревките финансии на Италија
Џорџа Мелони, лидерка на партијата Браќа на Италија, најверојатно ќе стане првата жена премиер на Италија која ќе ја предводи најдесничарската влада по Втората светска војна и ерата на Бенито Мусолини, откако нејзината тројна конзервативна коалиција триумфираше на парламентарните избори во неделата. Првичните резултати и излезните анкети покажуваат дека крајнодесничарскиот блок ќе има убедливо мнозинство во двата дома на парламентот, што е потенцијално ретка шанса за политичка стабилност во Италија по години на пресврти и кревки коалиции.
Но, Мелони и нејзините сојузници се соочуваат со растечки список на предизвици, вклучувајќи ги и зголемените цени на енергенсите, војната во Украина и повторното забавување на третата по големина економија во еврозоната.
„Мора да запомниме дека не сме на крајната, тукуна почетната точка. Од утре треба да ја докажеме нашата вредност“, им рече 45-годишната Мелони на поддржувачите на нејзината националистичка партија Браќа на Италија во понеделникот рано наутро.
Мелони ги минимизира постфашистичките корени на партијата и ја претставува како меинстрим политичка групација слична на британските конзервативци. Таа вети дека ќе продолжи да ја поддржува западната политика кон Украина и дека нема да експериментира со кревките финансии на Италија.
„Ако сме повикани да управуваме со оваа земја, тоа ќе го направиме за сите Италијанци со цел да ги обединиме луѓето и да се фокусираме на она што не обединува, а не на она што не разделува. Време е за одговорност“, рече таа.
Откако се преброени повеќе од половина од гласачките ливчиња, Браќа од Италија имаат 26 отсто од гласовите, што е огромен пораст во споредба со само 4 отсто на претходните парламентарни избори во 2018 година. За разлика од тоа, главниот сојузник на Мелони во централно-десничарската коалиција, како што официјално ја нарекуваат коалицијата, имаше катастрофална ноќ.
Лигата на Матео Салвини освои, според сегашните резултати, околу 9 отсто од гласовите, што е голем пад во споредба со повеќе од 17 отсто пред четири години, а Мелони ја престигна Лигата и во традиционалните упоришта на северот на земјата. Третиот член на таа коалиција, партијата Напред Италија на поранешниот премиер Силвио Берлускони, освои околу 8 отсто од гласовите, така што партијата Браќа на Италија е доминантна во коалицијата.
Ппопулистичкото движење пет ѕвезди освои 16 отсто од гласовите, додека центристичката коалиција околу партијата Акција освои 7 отсто од гласовите. Најголемата партија во коалицијата на левиот центар, Демократската партија, освои 19 отсто од гласовите.
„Ова е тажна ноќ за земјата. Десницата има мнозинство во парламентот, но не и во земјата“, изјави за новинарите истакнатата претставничка на Демократската партија, Дебора Серачиани.
Иако се предвидува дека десничарската коалиција ќе има комотно мнозинство и во горниот и во долниот дом на италијанскиот парламент, коалициските партнери имаат различни ставови за неколку прашања за кои можеби ќе биде тешко да се усогласат. За разлика од Мелони, Салвини ги доведува во прашање санкциите на Западот против Русија, а тој и Берлускони често го изразуваа своето восхитување од рускиот лидер Владимир Путин.
Тие, исто така, имаат различни ставови за тоа како да се справат со зголемените сметки за енергија и дадоа низа ветувања, вклучително и намалување на даноците и пензиски реформи, кои Италија ќе се бори да си ги дозволи.