Во време кога се инсистира на физичката дистанца, како една од основните мерки за спречување на ширење на коронавирусот, има места во светот каде што токму ова е најголемиот проблем со кој се соочуваат, едноставно поради немањето доволно простор.
Таков е примерот на Хонгконг, град во кој живеат 7,5 милиони луѓе. Проблемот е што урбаните јавни простори во овој град се многу мали и на жителите им се на располагање по околу 2,7 квадратни метри по човек, што е нешто малку повеќе од кабина на тоалет.
Хонгконг изобилува со паркови, но проблемот е што во нив не е дозволено да се седи на тревата, односно не е дозволено да се допираат растенијата, а онаму каде што има фонтани, просторот не е достапен за седење.
Поради ваквите строги правила за заштита на јавните простори, а од друга страна, кога се инсистира на одржување физичко растојание, жителите на Хонгконг се принудени за време на паузата од работа да користат невообичаени места за ручек: ескалатори, стреи, ходници, па дури и тоалети.
Дека јавниот простор е проблем покажуваат и голем број фотографии кои деновиве се појавија на социјалните мрежи.
