„На примопредавањето на функцијата, Ковачевски му честиташе на Филипче на изборот и му посака успех во работата и повторно градење на победнички СДСМ. Филипче се заблагодари за честитките, како и за ангажманот на Ковачевски во изминатите години како претседател на партијата и премиер на владата“, велат од партијата
Венко Филипче денеска во седиштето на партијата ја презеде функцијата претседател на Социјалдемократскиот сојуз (СДСМ) од поранешниот лидер Димитар Ковачевски, информираат од партијата.
„На примопредавањето на функцијата, Ковачевски му честиташе на Филипче на изборот и му посака успех во работата и повторно градење победнички СДСМ. Филипче се заблагодари за честитките, како и за ангажманот на Ковачевски во изминатите години, како претседател на партијата и премиер на владата“,
велат од СДСМ.
Венко Филипче е избра за нов претседател на Социјалдемократскиот сојуз (СДСМ) на 30 јуни, како што соопшти Централната изборна комисија на партијата, во фер и демократска процедура на внатрепартиски избори. Од излезените нешто над 12 илјади члена, Филипче доби 9 052 гласа.
Откако беа соопштени изборните резултати, Филипче се обрати од говорницата во партиското седиште. Според него, со овие избори СДСМ докажа дека има демократски капацитет и високо ниво на професионализам. Пред сопартијците посочи дека следи период на многу работа, обединување и реформа на СДСМ.
„Следува период на реорганизација и реформа согласно моите програмски ветувања со кои сум сигурен СДСМ повторно ќе победува. Ова нема да биде ниту брзо ниту лесно. Но, јас знам дека нема друг начин да ја вратиме довербата кај членовите освен да направиме вистински темелни промени. Промените не можеме да ги лажираме ниту да бидат половични. Граѓаните и нашите членови тоа ќе го препознаат, а така нема да ја вратат довербата. Промените мора да бидат вистински, искрени и истрајни, за да можеме полека, но сигурно да ги освојуваме срцата на граѓаните. Ако успееме во ова, верувам дека СДСМ ќе се врати посилен и ќе продолжи да биде мотор во општествениот напредок“,
рече Филипче.
Ковачевски на 22 мај официјално го потврди своето повлекување од претседателската функција на партијата, одлука што следуваше по изборниот неуспех на СДСМ на претседателските и парламентарните избори, кога тој најави избор на нов партиски лидер и раководство.
Во декември 2021 година Ковачевски стана лидер на СДСМ, избран на вторите директни внатрепартиски избори, кои се одржуваа како вонредни, по оставката на Зоран Заев. Од вкупно 44 406 члена што излегле на гласање, за него гласаа 37 649 члена.