Официјални лица велат оти истекувањето на нафтата оштетило околу 18 000 квадратни километри заштитени подрачја, населени со ретки растителни и животински видови
Властите во Перу соопштија оти поради вулканската ерупцијата на архипелагот Тонга, од рафинеријата „Ла Пампила“ протекле повеќе од 6 000 барели нафта, а излевањето на нафтата на брегот на земјата предизвикало еколошка катастрофа.
Официјални лица велат оти истекувањето на нафтата оштетило околу 18 000 квадратни километри заштитени подрачја, населени со ретки растителни и животински видови.
Властите ги затворија трите најпогодени плажи каде има многу мртви животни покриени со нафта, а претставници на Министерството за надворешни работи го повикаа операторот „Репсол“ да плати отштета.
„Ова е најлошата еколошка катастрофа што се случи околу Лима во последно време и која сериозно оштети стотици семејства на рибари. „Репсол“ мора веднаш да ја надомести штетата“,
објави Министерството на Твитер.
Портпаролката на компанијата Тина ван ден Вол Бејк ја негираше одговорноста велејќи дека излевањето се случило во ограничена област.
„Ние не ја предизвикавме оваа еколошка катастрофа и не можеме да кажеме кој е одговорен“,
рече Ван ден Вол Бејк.
Но, премиерката Мирта Васкез подоцна изјави дека компанијата „очигледно“ немала план како да се справи со истекувањето на нафтата во случај на непредвидена ситуација.
Обвинителите започнаа истрага за улогата на „Репсол“ во инцидентот, а Министерството за животна средина предупреди дека компанијата може да плати казна од повеќе од 34,5 милиони долари.
Минатата седмица се случи подводна вулканска ерупција на архипелагот Тонга, која траела осум минути и била толку силна што се слушала „како далечен грмеж“ дури до островите Фиџи, оддалечени повеќе од 800 километри, соопштија властите на оваа држава.